Ish-bashkëshorti i Britney Spears, Sam Asghari, ka reaguar pas arrestimit të këngëtares për drejtim automjeti nën ndikimin e alkoolit (DUI), duke thënë se “të gjithë bëjnë gabime”.
Gjatë një interviste në emisionin Piers Morgan Uncensored, Asghari deklaroi se situata e ish-bashkëshortes së tij i kujton përvojat e grave në Iran që përballen me shtypje.
“Duke ardhur nga Iran dhe duke parë gratë që shtypen atje, kjo është diçka që më ka mbetur në mendje,” tha ai.
Aktori 32-vjeçar shtoi se, në një farë mënyre, edhe Spears është përballur me një formë shtypjeje.
“Nuk po krahasoj situatat, por edhe ajo është shtypur nga shumë njerëz që kanë përfituar prej saj dhe ka kaluar përvoja të ngjashme me ato që përjetojnë gratë në Iran,” u shpreh ai.
Asghari tha se gjithmonë do ta respektojë ish-partneren e tij, duke kujtuar se ata kanë qenë bashkë për shtatë vite, edhe pse martesa e tyre zgjati vetëm një vit. “E kam parë se me çfarë lufton ajo. Vlerat dhe respekti që kam për të do të jenë gjithmonë aty,” tha ai.
Ai theksoi gjithashtu se është i bindur që Spears do ta kapërcejë këtë situatë.
“Nëse ka bërë një gabim, mendoj se ajo është një grua e fortë dhe mund të rikthehet prej kësaj,” shtoi ai.
Kur u pyet nga Piers Morgan nëse ata ende komunikojnë, Asghari nuk dha një përgjigje të drejtpërdrejtë, por tha se gjithmonë do ta vlerësojë kohën që kanë kaluar bashkë.
Spears dhe Asghari nisën lidhjen në vitin 2016, u fejuan në 2021 dhe u martuan në vitin 2022. Ata u ndanë në verën e vitit 2023, ndërsa divorci u finalizua në maj 2024.
Këngëtarja u arrestua javën e kaluar nga policia rrugore në California nën dyshimin për drejtim automjeti nën ndikimin e alkoolit. Ajo u lirua disa orë më vonë nga burgu i Ventura County Jail dhe pritet të paraqitet në gjykatë në muajin maj.
