Reperi i njohur Kanye West po përballet me akuza të rënda për sulm seksual nga modelja Jennifer An, e cila pretendon se incidenti ndodhi gjatë xhirimeve të videoklipit In for the Kill të artistes La Roux në vitin 2010.
Në një padi të ngritur në vitin 2024, An pretendon se gjatë xhirimeve në Chelsea Hotel, New York City, West e ka sulmuar fizikisht dhe seksualisht para kamerave.
Sipas dokumenteve të reja të paraqitura në gjykatë, këngëtarja La Roux (emri i vërtetë Elly Jackson) i ka dërguar mesazhe modeles ku shprehet se ngjarja ishte “e tmerrshme”.
“Nuk mund ta harroj kurrë atë që ndodhi, ishte e tmerrshme. Si mund të të ndihmoj?” thuhet në një nga mesazhet e saj, sipas dokumenteve të siguruara nga People.
Këngëtarja e hitit Bulletproof ka thënë gjithashtu se është e gatshme të dëshmojë për atë që ka parë gjatë xhirimeve.
Sipas padisë, West mori kontrollin kreativ të xhirimeve dhe gjatë një skene dyshohet se e kapi modelen nga fyti dhe e mbyti përpara kamerave. Dokumentet pretendojnë gjithashtu se ai vendosi gishtat në gojën e saj për të simuluar një akt seksual të detyruar, duke thënë: “Kjo është art”. Modelja ka deklaruar se gjatë incidentit kishte vështirësi në frymëmarrje dhe mendonte se mund të humbiste ndjenjat.
Avokatët e Kanye West kanë kërkuar rrëzimin e padisë, duke argumentuar se veprimet ndodhën gjatë realizimit të një projekti artistik dhe duhet të mbrohen nga liria e shprehjes.
