Regjisori i njohur Quentin Tarantino ka kritikuar ashpër aktoren Rosanna Arquette pasi ajo denoncoi përdorimin e fjalës raciste në filmin kult Pulp Fiction.
Arquette, e cila kishte një rol të vogël në film si bashkëshortja e personazhit të luajtur nga Eric Stoltz, deklaroi në një intervistë për The Times se është e lodhur nga përdorimi i kësaj fjale në filma.
“Është një film ikonë në shumë nivele, por personalisht jam kundër përdorimit të fjalës N. E urrej. Nuk mund ta pranoj që Tarantino ka marrë një ‘leje të lirë’ për ta përdorur. Nuk është art, është thjesht racist dhe i frikshëm,” tha ajo.
Pas këtyre komenteve, Quentin Tarantino reagoi me një letër, të publikuar nga Variety, ku akuzoi aktoren se po kërkon vëmendje mediatike.
“Shpresoj që publiciteti që po merr nga qindra media që po shkruajnë për ty ia ka vlejtur për të më munguar respektin mua dhe një filmi për të cilin më kujtohet shumë mirë që ishe e lumtur të ishe pjesë,” shkroi ai.
Regjisori theksoi gjithashtu se Arquette e pranoi rolin dhe pagesën në atë kohë, duke e quajtur kritiken e saj të tanishme një veprim pa klas.
Debati për përdorimin e gjuhës raciste në filmat e Tarantinos nuk është i ri. Në të kaluarën, aktorë që kanë punuar me të, si Samuel L. Jackson dhe Jamie Foxx, e kanë mbrojtur regjisorin. Jackson ka thënë se ndalimi i një autori për të përdorur një gjuhë të caktuar në dialogët e personazheve do ta bënte historinë jo realiste.
Filmi Pulp Fiction, i publikuar në vitin 1994, konsiderohet një nga veprat më të rëndësishme të kinemasë moderne dhe ka në kast aktorë si John Travolta, Uma Thurman dhe Bruce Willis.
