Një kapitull i ri në jetën e Angelina Jolie mund të nisë larg Hollywood-it. Sipas burimeve pranë aktores, ajo ka pritur që binjakët e saj, Vivienne dhe Knox, të mbushin 18 vjeç përpara se të realizojë një plan të menduar prej kohësh: zhvendosjen jashtë Shteteve të Bashkuara.
“Angelina nuk ka dashur kurrë të jetojë me kohë të plotë në Los Anxhelos,” ka thënë një burim për People, duke shtuar se për shkak të marrëveshjes së kujdestarisë me ish-bashkëshortin Brad Pitt, ajo ishte e detyruar të qëndronte në SHBA. Binjakët e saj më të vegjël, Vivienne dhe Knox, mbushin 18 vjeç më 12 korrik, çka i hap rrugën aktores për të ndërmarrë hapin e madh.
Sipas të njëjtit burim, Jolie po shqyrton disa destinacione jashtë vendit dhe do të jetë “shumë e lumtur” kur të mund të largohet nga Los Anxhelosi. Në një intervistë për The Hollywood Reporter në vitin 2024, ajo u shpreh se prioriteti i saj kryesor janë fëmijët.
“Kur ke një familje të madhe, dëshiron që ata të kenë privatësi, paqe dhe siguri,” deklaroi aktorja e “Eternals”. Ajo shtoi se planifikon të kalojë shumë kohë në Kamboxhia, vend me të cilin ka një lidhje të veçantë emocionale.
Jolie adoptoi fëmijën e saj të parë, Maddox, nga Kamboxhia në vitin 2002. Më vonë, ajo ka treguar se ky vend ndryshoi jetën e saj.
“Kamboxhia ishte vendi që më bëri të ndërgjegjshme për çështjen e refugjatëve,” ka thënë ajo, duke përmendur edhe angazhimin e saj me UNHCR.
Përveç Maddox, Jolie dhe Pitt adoptuan edhe Zahara dhe Pax, ndërsa kanë tre fëmijë biologjikë: Shiloh, Vivienne dhe Knox.
Jolie ka qenë e hapur edhe për kritikat ndaj situatës aktuale në SHBA. Gjatë një paneli në Festivalin e Filmit në San Sebastián, ajo deklaroi: “E dua vendin tim, por në këtë moment nuk e njoh më.”
Aktorja ka shprehur më herët kundërshtimin e saj ndaj politikave të emigracionit të presidentit Donald Trump, duke theksuar se siguria kombëtare nuk duhet të vijë në kurriz të diskriminimit.
