Brooklyn Beckham dhe bashkëshortja e tij, Nicola Peltz, thuhet se po planifikojnë të adoptojnë një fëmijë, në një kohë kur përplasjet e tij me prindërit, David dhe Victoria Beckham, janë thelluar edhe më tej.
Sipas një raportimi të The Sun, publikuar të premten, çifti ka zhvilluar “disa biseda serioze” për rritjen e një fëmije që nuk do të ishte biologjikisht i tyre. Një mik i afërt i çiftit ka treguar se kjo është një çështje për të cilën ata janë plotësisht në një mendje.
“Kjo është diçka ku Nicola dhe Brooklyn përputhen plotësisht,” tha burimi. “Ata duan një familje të madhe dhe dëshirojnë që të paktën një nga fëmijët e tyre të jetë i adoptuar.”
Sipas burimit, të dy janë shumë të vetëdijshëm për privilegjin që kanë dhe ndjejnë përgjegjësinë për të dhënë diçka mbrapsht, duke i ofruar një fëmije në nevojë mundësinë për një jetë sa më të mirë.
“Ata e kanë diskutuar këtë. Nicola sapo ka humbur shumë peshë për rolin e saj më të fundit në film, ndaj të pasurit e një fëmije biologjik për momentin nuk shihet si opsion,” shtoi burimi.
Ky zhvillim vjen disa javë pasi Brooklyn deklaroi publikisht se nuk kishte asnjë interes për t’u pajtuar me familjen e tij, përfshirë prindërit dhe vëllezërit e motrën — Romeo, 23 vjeç, Cruz, 20 vjeç dhe Harper, 14 vjeçe. Në një reagim të fortë në rrjetet sociale, ai akuzoi prindërit se kishin tentuar të shkatërronin martesën e tij me Nicolën dhe pretendoi se Victoria Beckham kishte pasur sjellje të papërshtatshme në dasmën e tij në vitin 2022.
“Brooklyn përmendi fëmijët, ‘familjen e ardhshme’ në deklaratën e tij — këto nuk ishin fjalë të zgjedhura rastësisht,” tha burimi.
Ndërkohë, David dhe Victoria Beckham, të cilët përshkruhen si njerëz shumë të përkushtuar ndaj familjes dhe që e adhurojnë idenë për t’u bërë gjyshër, po përballen me një dhimbje të re. Sipas burimeve, do të ishte jashtëzakonisht e vështirë për ta të mos kishin asnjë rol në jetën e një nipi apo mbese të mundshme.
“Vetë ideja që mund të mësojnë për një foshnjë të adoptuar përmes Instagramit është e padurueshme për ta, por fatkeqësisht është një mundësi reale,” shtoi burimi.
