Khloé Kardashian ka hedhur poshtë thashethemet se është ribashkuar me ish-partnerin e saj, Tristan Thompson.
Zërat për një rikthim të mundshëm nisën gjatë festave të fundvitit, pasi fansat vunë re se emri i Tristan Thompson ishte rikthyer në shtëpizën tradicionale prej biskotash (gingerbread house) të familjes Kardashian-Jenner, pasi mungonte vitin e kaluar. Në listën e emrave ishin përfshirë gjithashtu partneri i Kylie Jenner, Timothée Chalamet, si dhe bashkëshorti i Kourtney Kardashian, Travis Barker.
Megjithatë, kur një ndjekëse shprehu shqetësimin e saj në një postim të Khloé Kardashian në Instagram për Krishtlindje, ajo reagoi menjëherë për të sqaruar situatën.
“E shoh që Tristan është në shtëpizën e biskotave, por ai nuk do të ndryshojë. Ki kujdes!”, shkroi ndjekësja.
Khloé iu përgjigj: “Ai është babai i fëmijëve të mi dhe do të jetë gjithmonë pjesë e familjes sonë.” Ajo shtoi gjithashtu se prioriteti i saj absolut janë fëmijët: “Faleminderit gjithsesi! Më beso, fëmijët e mi vijnë gjithmonë të parët. Gëzuar Krishtlindjet!”
Khloé Kardashian dhe Tristan Thompson nisën lidhjen e tyre në vitin 2016 dhe në vitin 2018 u bënë prindër të vajzës së tyre, True. Marrëdhënia e tyre është shoqëruar nga disa skandale tradhtie nga ana e basketbollistit, përfshirë një incident pak para lindjes së vajzës së tyre dhe një tjetër në vitin 2019, kur ai u përfol për një puthje me shoqen e ngushtë të Kylie Jenner, Jordyn Woods.
Çifti u nda dhe u ribashkua disa herë ndër vite, por lidhja përfundoi përfundimisht në vitin 2021, pasi Thompson konfirmoi se kishte sjellë në jetë një fëmijë me një grua tjetër. Megjithatë, në korrik të vitit 2022, Khloé dhe Tristan u bënë prindër për herë të dytë të djalit të tyre, Tatum, përmes një nëne surrogate.
