Christian Pulisic ka reaguar publikisht ndaj thashethemeve që e lidhin atë në mënyrë romantike me aktoren e serialit “Euphoria”, Sydney Sweeney.
Pas zërave që qarkulluan në rrjet se futbollisti 27-vjeçar ishte në një lidhje me aktoren 28-vjeçare, pas ndarjes së saj në mars nga ish-i fejuari Jonathan Davino, kapiteni i Kombëtares së SHBA-së (USMNT) vendosi të sqarojë situatën përmes rrjeteve sociale.
“Ju lutem ndaloni me historitë e shpikura për jetën time personale,” shkroi Pulisic në Instagram Stories. “Burimet duhet të mbahen përgjegjëse, sepse këto gjëra mund të ndikojnë në jetën e njerëzve.”
Në një tjetër postim në Instagram që pretendonte se ai ishte në lidhje me aktoren e filmit “Anyone But You”, Pulisic komentoi drejtpërdrejt:
“Fake news, njerëz. Të ndalojmë me këto thashetheme pa kuptim.”
Sipas raportimeve, thashethemet nisën më 25 dhjetor, kur kolumnistë të Gazzetta-s në Itali raportuan se zërat e pakonfirmuar kishin origjinë nga një faqe në Instagram me emrin Bomber’s DNA, përpara se të përhapeshin gjerësisht në internet.
Megjithatë, Pulisic raportohet se është në një lidhje me sportisten Alexa Melton që prej vitit 2024. Nga ana tjetër, Sydney Sweeney është në një lidhje me Scooter Braun që prej fillimit të shtatorit.
Një burim i tha revistës PEOPLE në fillim të dhjetorit se marrëdhënia mes Sweeney dhe Braun po ecën shumë mirë.
“Gjërat mes Scooter dhe Sydney janë shumë të forta dhe po shkojnë shkëlqyeshëm. Ata janë në një lidhje të përkushtuar dhe serioze,” tha burimi.
Sweeney dhe Braun janë parë disa herë bashkë gjatë vjeshtës dhe festave të fundvitit, përfshirë edhe një moment ku u fotografuan duke u puthur në Central Park në Nju Jork në muajin nëntor. Ata u panë gjithashtu duke u mbajtur për dore gjatë një daljeje në Los Angeles në fund të shtatorit.
Sipas burimeve, miqtë dhe familja e aktores janë “shumë të lumtur” për këtë lidhje, ndërsa edhe rrethi i afërt i Braun shprehet i kënaqur ta shohë atë të lumtur pas divorcit të tij në vitin 2022 nga Yael Cohen, me të cilën ka tre fëmijë.
“Ai e admiron shumë Sydney-n dhe mendon se ajo është inteligjente, e sjellshme dhe argëtuese,” tha burimi. “Ndërsa ajo vlerëson faktin që ai e sheh për atë që është, përtej gjithë zhurmës mediatike.”
