Producenti dhe regjisori amerikan Tyler Perry është paditur me 77 milionë dollarë në Kaliforni, pasi një aktor tjetër ka ngritur akuza për sulm seksual, duke e bërë këtë rastin e dytë të tillë brenda pak muajsh.
Mario Rodriguez, i cili ka luajtur në filmin “Boo! A Madea Halloween”, ka depozituar padinë kundër Perry-t dhe kompanisë Lionsgate, duke pretenduar se regjisori ka bërë sjellje të papërshtatshme ndaj tij përgjatë disa viteve.
Sipas dokumenteve gjyqësore, Rodriguez thotë se e ka njohur Perry-n në vitin 2015 në një palestër në Los Angeles dhe se në vitin 2018, pas një darke ku u diskutua për një rol të mundshëm në serialin “The Oval”, Perry ka bërë një veprim seksual të padëshiruar.
Rodriguez pretendon gjithashtu se një incident i ngjashëm ka ndodhur edhe në vitin 2019 dhe se, pasi refuzoi këto afrime, Perry i kishte ofruar shuma parash.
Në padi, Rodriguez akuzon edhe Lionsgate, duke pretenduar se kompania ishte në dijeni të sjelljeve të dyshuara të Perry-t dhe megjithatë ka vazhduar ta financojë atë, pa ndërhyrë për të mbrojtur aktorët.
Avokati i Tyler Perry-t, Alex Spiro, i ka quajtur akuzat një “tentativë për përfitim financiar”, duke deklaruar për Page Six se i njëjti avokat ka dështuar më parë në një çështje tjetër kundër Perry-t dhe se edhe kjo padi do të dështojë.
Kjo padi vjen disa muaj pasi Derek Dixon, një tjetër aktor nga seriali “The Oval”, ngriti një padi prej 260 milionë dollarësh kundër tij, duke e akuzuar për ngacmim seksual, sulm dhe shantazh profesional.
Dixon ka deklaruar se kishte frikë të kundërshtonte ose të raportonte sjelljet e dyshuara, nga frika se do të humbiste rolin e tij në serial.
Edhe në atë rast, avokatët e Perry-t i mohuan akuzat, duke i quajtur ato të fabrikuara dhe një “mashtrim”.
