Aktori amerikan Pat Finn ka ndërruar jetë në moshën 60-vjeçare pas një beteje të gjatë me kancerin. Lajmi u konfirmua për PEOPLE nga përfaqësuesi i tij, i cili bëri të ditur se Finn u nda nga jeta të hënën, më 22 dhjetor.
Pat Finn ishte më i njohur për rolin e Bill Norwood në serialin e njohur të ABC, “The Middle”, ku u shfaq nga viti 2011 deri në përfundimin e serialit në vitin 2018.
Ai ishte gjithashtu pjesë e disa prej sitcom-eve më ikonike të viteve ’90, përfshirë “Seinfeld”, ku interpretoi personazhin Joe Mayo, dhe “Friends”, ku luajti Dr. Roger, të dashurin e Monicës (Courteney Cox).
Karriera e tij përfshinte edhe role kryesore në “The George Wendt Show” (1995) si Dan Coleman, si dhe një rol të përsëritur në “Murphy Brown” nga viti 1995 deri në 1997, ndër shumë projekte të tjera televizive.
“Po konfirmojmë me shumë trishtim se Pat u nda nga jeta më 22 dhjetor,” tha përfaqësuesi i tij. “Ai ishte njeriu më i sjellshëm dhe më i gëzueshëm në çdo ambient. Do të na mungojë buzëqeshja e tij e madhe dhe zemra edhe më e madhe.”
Sipas TMZ, Pat Finn vdiq në shtëpinë e tij në Los Angeles, i rrethuar nga familja. Ai lë pas bashkëshorten e tij prej 35 vitesh, Donna, dhe tre fëmijët e tyre: Cassidy, Caitlin dhe Ryan.
Në një deklaratë për New York Post, përfaqësuesi i tij bëri të ditur se Finn kishte luftuar me kancer në fshikëz në vitin 2022, kishte hyrë në remision, por sëmundja u rikthye dhe u përhap. “Ai ishte një luftëtar në çdo kuptim të fjalës,” thuhej në deklaratë.
Familja e tij e kujtoi aktorin për humorin, dashurinë dhe pasionin për ekipin e tij të zemrës, Chicago Bears.
“Pas një jete të bukur të mbushur me të qeshura, dashuri, familje dhe miq, ndajmë me dhimbje lajmin e ndarjes nga jeta të Pat Finn,” thuhej në deklaratën e familjes. “Në ditët e tij të fundit, reagimi i tij më i fortë ishte sa herë që Bears shënonin një touchdown.”
