Policia Metropolitane e Londrës njoftoi të martën se komediani dhe aktori britanik Russell Brand, 50 vjeç, është akuzuar me një rast përdhunimi dhe një rast sulmi seksual, që lidhen me dy gra të ndryshme.
Në një deklaratë zyrtare, Detektivi Kryeinspektor Tariq Farooqi tha se gratë që kanë bërë kallëzime, përfshirë ato që lidhen me akuzat e reja, po marrin mbështetje nga oficerë të trajnuar posaçërisht.
“Hetimet e Policisë Metropolitane janë ende në vazhdim dhe u bëjmë thirrje të gjithë atyre që janë prekur nga ky rast, apo që kanë informacion, të kontaktojnë policinë,” tha Farooqi. Ai shtoi se është në dispozicion edhe mbështetje nga organizata e pavarur Rape Crisis përmes linjës së saj 24-orëshe.
Akuzat e fundit vijnë tetë muaj pasi Brand u padit për herë të parë me disa vepra penale të rënda, përfshirë përdhunim, përdhunim oral, sulm seksual dhe akt të pahijshëm, pas kallëzimeve nga katër gra të ndryshme. Sipas policisë, ngjarjet e dyshuara në atë dosje kanë ndodhur mes viteve 1999 dhe 2005.
Brand i ka mohuar akuzat, duke deklaruar se, megjithëse ka qenë “i pamatur” në rininë e tij, nuk ka marrë pjesë kurrë në veprime pa pëlqim.
Hetimet ndaj tij nisën në vitin 2023, pas publikimeve hetimore nga Channel 4 Dispatches dhe Sunday Times.
Në lidhje me pesë akuzat fillestare, gjyqi i Russell Brand pritet të nisë në qershor 2026 në Gjykatën e Kurorës në Southwark, Londër.H3
