Publikimi më i fundit i dokumenteve të lidhura me Jeffrey Epstein ka vënë sërish nën vëmendjen e publikut disa nga figurat më me ndikim në politikë, biznes, argëtim dhe akademi. Zbulimi, i bërë nga Departamenti Amerikan i Drejtësisë më 19 dhjetor, i shtohet publikimeve të mëparshme të dokumenteve që lidhen me rrjetin e ish-të dënuarit për krime seksuale.
Autoritetet kanë theksuar se përmendja e emrave apo shfaqja e fotografive në dosje nuk përbën provë për përfshirje kriminale. Sipas zyrtarëve, dokumentet pasqyrojnë marrëdhënie profesionale ose shoqërore mes Epstein dhe figurave të ndryshme publike, përfshirë ish-presidentin Bill Clinton dhe muzikantë si Michael Jackson dhe Mick Jagger.
Mes figurave më të njohura të përfshira në dokumente është Bill Clinton, i cili shfaqet në disa fotografi përkrah Epstein dhe ish-bashkëpunëtores së tij Ghislaine Maxwell, tashmë e dënuar për trafikim seksual. Disa nga imazhet e paraqesin ish-presidentin në ambiente shoqërore, përfshirë fotografi ku shfaqen gra me fytyrat e mbuluara.
Një tjetër biznesmen i njohur i përmendur në dokumente është Richard Branson. Në botën e muzikës, këngëtari i grupit The Rolling Stones, Mick Jagger, shfaqet në disa fotografi. Email-et e publikuara si pjesë e dokumenteve tregojnë se Epstein i referohej Jagger-it si një kontakt kyç, duke sugjeruar se ai mund ta ketë ndihmuar Epsteinin të krijonte lidhje në qarqet e argëtimit. Në dosje përmendet gjithashtu edhe Michael Jackson.
Në industrinë e filmit, regjisori Woody Allen shfaqet në disa fotografi duke biseduar dhe duke darkuar me Epstein. Edhe aktori Kevin Spacey përmendet ndër personalitetet emrat e të cilëve figurojnë në materialet e publikuara së fundmi.
Sfera akademike përfaqësohet nga gjuhëtari dhe filozofi Noam Chomsky, emri i të cilit shfaqet në dosje për shkak të pjesëmarrjes së tij në takime dhe diskutime akademike ku ishte i pranishëm edhe Epstein.
Një zëdhënës i Bill Clinton ka mbrojtur ish-presidentin në një deklaratë të publikuar në platformën X të premten në mbrëmje.
“Shtëpia e Bardhë nuk i ka mbajtur të fshehura këto dosje për muaj të tërë vetëm për t’i publikuar të premten vonë me qëllim mbrojtjen e Bill Clinton,” tha Angel Ureña. “Kjo ka të bëjë me mbrojtjen e vetes nga ajo që vjen më pas, ose nga ajo që do të përpiqen ta fshehin përgjithmonë. Mund të publikojnë sa fotografi të paqarta, 20-vjeçare të duan, por kjo nuk ka qenë kurrë për Bill Clinton dhe nuk do të jetë.”
“Ka dy lloje njerëzish këtu. Grupi i parë nuk dinte asgjë dhe e ndërpreu kontaktin me Epstein para se krimet e tij të bëheshin publike. Grupi i dytë vazhdoi marrëdhëniet me të edhe më pas. Ne jemi në grupin e parë. Asnjë vonesë apo manovër nga grupi i dytë nuk do ta ndryshojë këtë,” shtoi Ureña.
Maria Farmer, gruaja e parë që paraqiti një kallëzim penal kundër Epstein në vitin 1996, deklaroi para publikimit të dokumenteve se kishte pritur për dekada që këto materiale të bëheshin publike. Ajo akuzoi gjithashtu FBI-në se e kishte injoruar gjatë një prej periudhave më traumatike të jetës së saj.
“Kur FBI-ja më injoroi dhe ma mbylli telefonin në vitin 1996, bota ime u përmbys dhe u ndjeva sikur mbeta e ngrirë në kohë,” tha Farmer në një deklaratë të publikuar në Instagram. “U përballa me kërcënime me vdekje, tallje dhe përqeshje nga disa prej njerëzve më të fuqishëm në botë.”
“Jam gjithashtu shpresëplotë se ky do të jetë një hap i rëndësishëm për shumë të mbijetuar dhe për të mbajtur qeverinë përgjegjëse për dështimin e saj grotesk në zbatimin e ligjit, një nga më të mëdhenjtë në historinë e SHBA-së,” shtoi ajo.
