James Ransone, aktori i njohur për rolin e Ziggy Sobotka në serialin kult të HBO-së “The Wire”, ka ndërruar jetë në moshën 46-vjeçare.
Lajmi është konfirmuar nga Zyra e Mjekut Ligjor të Qarkut të Los Angelesit, e cila regjistroi vdekjen e tij si vetëvrasje, të premten e 19 dhjetorit në Los Angeles. Ransone u gjet i pajetë dhe autoritetet nuk kanë konstatuar ndonjë akt kriminal në lidhje me ngjarjen.
Ransone ishte i martuar dhe baba i dy fëmijëve. Bashkëshortja e tij, Jamie McPhee, ka shpërndarë në rrjetet sociale një fushatë donacionesh në mbështetje të National Alliance on Mental Illness, duke nxitur ndërgjegjësimin për shëndetin mendor.
Ransone u bë i njohur për publikun e gjerë me rolin e Ziggy Sobotka, djalit të Frank Sobotkës, në sezonin e dytë të “The Wire” (2003), ku u shfaq në 12 episode. Seriali i famshëm i HBO-së u transmetua nga viti 2002 deri në 2008 dhe konsiderohet një nga produksionet më të vlerësuara në historinë e televizionit.
Gjatë karrierës së tij, Ransone luajti edhe në seriale të tjera të njohura si “Generation Kill”, “Treme”, “Bosch” dhe “Poker Face”, ku pati paraqitjen e tij të fundit televizive në sezonin e dytë që u transmetua në qershor.
Në kinematografi, ai u shfaq në filma si: “Sinister” dhe “Sinister 2”, “Tangerine”, “Mr. Right”, “It: Chapter Two”,“The Black Phone” dhe vazhdimi i tij që pritet të dalë në vitin 2025.
Në vitin 2021, Ransone doli publikisht si i mbijetuar i abuzimit seksual në fëmijëri, duke treguar se kishte përjetuar trauma të rënda që ndikuan thellësisht në jetën e tij.
Ai foli hapur edhe për varësinë nga substancat, duke zbuluar se kishte arritur të qëndronte i pastër që nga viti 2006, pas disa vitesh lufte me varësinë.
