Nicki Minaj ka fshirë llogarinë e saj në rrjetet sociale pasi u përball me kritika të shumta pas pjesëmarrjes në eventin Turning Point USA – AmericaFest, që u mbajt të dielën në Phoenix, Arizona.
Reperja 43-vjeçare humbi afro 10 milionë ndjekës pasi doli në skenë së bashku me Erika Kirk, drejtore ekzekutive e Turning Point USA dhe e veja e aktivistit politik Charlie Kirk, i cili u vra në shtator.
Pas reagimeve të ashpra online, Minaj vendosi të largohej plotësisht nga platforma. Gjatë fjalimit të saj në event, Minaj i nxiti të rinjtë, veçanërisht meshkujt, të ndjekin shembullin e ish-presidentit Donald Trump, duke e përshkruar atë si “të pashëm dhe karizmatik”.
“Ai u ka dhënë shumë njerëzve shpresë se e keqja mund të mposhtet dhe se mund të fitosh me kokën lart,” tha Minaj.
Ajo krahasoi gjithashtu veten me Trump-in, duke theksuar se të dy janë rritur në Queens, New York, dhe foli për rikthimin pas periudhave të vështira në jetë.
Minaj sulmoi ashpër edhe guvernatorin e Kalifornisë, Gavin Newsom, duke përdorur nofkën fyese “Newscum” dhe duke kritikuar qëndrimet e tij për çështjet që lidhen me fëmijët transgjinorë.
“Të rriturit normalë duan të shohin fëmijë të lumtur dhe të sigurt,” tha ajo, duke lexuar edhe disa postime të saj kritike nga rrjetet sociale.
Artistja foli gjithashtu për besimin e saj fetar dhe përndjekjen e të krishterëve në Nigeri, duke deklaruar:
“Nuk do të heshtim më kurrë. Do të flasim për të krishterët kudo në botë.”
Minaj u shpreh se nuk ka ndërmend të tërhiqet më nga bindjet e saj dhe se nuk e ka ndjerë fare reagimin negativ nga industria e muzikës. “Ne jemi ‘fëmijët cool’. Të tjerët janë thjesht të pakënaqur,” tha ajo për kritikët.
