Filmi më i fundit i Timothée Chalamet po rishkruan historinë e studios A24. “Marty Supreme”, një dramë sportive me elemente komedie e drejtuar nga Josh Safdie, ka dominuar arkëtimet gjatë festave të Krishtlindjeve, duke regjistruar hapjen e dytë më të suksesshme në historinë e studios dhe duke forcuar statusin e Chalamet si një nga aktorët më fitimprurës të kinemasë moderne.
Sipas të dhënave të arkëtimeve, “Marty Supreme” ka gjeneruar 28.3 milionë dollarë në tregun amerikan gjatë pesë ditëve të para të shfaqjes, nga Vigjilja e Krishtlindjes deri të dielën. Shifra i afrohet rekordit aktual të A24, i mbajtur nga filmi “Civil War”, raportoi Variety.
Brenda vetëm pesë ditësh, studioja arriti të rikuperojë pothuajse gjysmën e investimit – një arritje e rrallë për një film origjinal, të klasifikuar R, në zhanrin sportiv.
Në film, Timothée Chalamet luan rolin e Marty Mauser, një talent i ri dhe ambicioz i pingpongut, i cili përballet me ëndrrat, mashtrimet dhe kërkimin e identitetit në Nju Jorkun e viteve 1950. Filmi përfshin gjithashtu një kast mbështetës të larmishëm, ku bëjnë pjesë Gwyneth Paltrow, Odessa A’zion, Tyler, The Creator, Fran Drescher, Kevin O’Leary, Abel Ferrara, si dhe emra të tjerë.
Para daljes në kinema, “Marty Supreme” u prit shumë mirë nga kritika, duke arritur një vlerësim prej 95% në Rotten Tomatoes.
