Tracy Reiner ka reaguar publikisht pas vdekjes tragjike të babait të saj, regjisorit të njohur Rob Reiner, dhe bashkëshortes së tij Michele Singer Reiner.
“Isha pjesë e familjes më të mrekullueshme që ka ekzistuar ndonjëherë,” tha Tracy, 61 vjeç, për NBC News. “Nuk di çfarë të them. Jam në shok.”
Rob Reiner u bë baba i Tracy-t përmes adoptimit gjatë martesës së tij me aktoren dhe regjisoren e ndjerë Penny Marshall.
Ndërkohë, Nick Reiner, 32 vjeç, djali i Rob dhe Michele, ndodhet tashmë në paraburgim, pasi u mor në pyetje nga Divizioni i Grabitje-Vrasjeve i Departamentit të Policisë së Los Angeles-it lidhur me vdekjen e prindërve të tij.
Burime të shumta, që kanë folur për PEOPLE pas ngjarjes, kanë deklaruar se Nick dyshohet se ka vrarë Rob dhe Michele në shtëpinë e tyre në Los Angeles. Çifti u gjet i pajetë të dielën, më 14 dhjetor, nga vajza e tyre Romy Reiner, sipas të njëjtave burime.
Rob dhe Michele u martuan në vitin 1989 dhe kishin tre fëmijë së bashku: Jake, Nick dhe Romy. Nick ka folur më herët publikisht për betejat e tij me varësinë nga substancat, të cilat nisën që në adoleshencë.
Sipas Departamentit të Zjarrfikëses së Los Angeles-it (LAFD), rreth orës 15:30 të së dielës, autoritetet u thirrën në banesë për të ofruar ndihmë mjekësore. Me mbërritjen në vendngjarje, ata gjetën një burrë dhe një grua të pajetë.
Rob Reiner dhe Michele Singer Reiner u njohën gjatë kohës kur Rob ishte regjisor i filmit ikonë “When Harry Met Sally”. Ai është autor i disa prej filmave më të njohur të kinemasë amerikane, përfshirë The Princess Bride (1987), Misery (1990) dhe A Few Good Men (1992).
Në një deklaratë për Variety, familja Reiner u shpreh:
“Me dhimbje të thellë njoftojmë ndarjen tragjike nga jeta të Michele dhe Rob Reiner. Jemi të shkatërruar nga kjo humbje e papritur dhe kërkojmë privatësi në këtë periudhë jashtëzakonisht të vështirë.”
