Katy Perry ka ngritur një padi prej 5 milionë dollarësh ndaj një veterani 85-vjeçar lidhur me një mosmarrëveshje shumëvjeçare për një pronë në Montecito, Kaliforni. Bëhet fjalë për një vilë me vlerë 15 milionë dollarë, të cilën këngëtarja e bleu para më shumë se pesë vitesh.
Konflikti nisi në korrik 2020, kur Perry dhe ish-partneri i saj, aktori Orlando Bloom, blenë një vilë me tetë dhoma gjumi nga Carl Westcott, një ish-ushtarak amerikan. Në një letër drejtuar Westcott-it, çifti e kishte lutur ta pranonte ofertën, duke thënë se prisnin një fëmijë dhe besonin se ajo shtëpi do të ishte vendi ideal për të ngritur familjen e tyre.
Mirëpo, vetëm pak ditë pas nënshkrimit të kontratës, Westcott kërkoi ta anulonte marrëveshjen, duke argumentuar se nuk kishte qenë në gjendje mendore për të kuptuar çfarë po firmoste, pasi ishte nën efektin e ilaçeve kundër dhimbjes pas një operacioni në shpinë.
Në dhjetor 2023, gjykata vendosi në favor të Perry-t, duke deklaruar se Westcott nuk paraqiti prova bindëse për paaftësi mendore. Avokati i këngëtares gjithashtu theksoi se ai kishte një ofertë rezervë nga Maria Shriver, ish-bashkëshortja e Arnold Schwarzenegger.
Pas fitores në gjykatë, Perry kundërpaditi duke kërkuar 3.25 milionë dollarë për qiratë e humbura gjatë betejës ligjore, 2.2 milionë dollarë për riparime të pretenduara të pronës dhe rreth 3 milionë dollarë të tjera në kosto ligjore — në total pothuajse 5 milionë dollarë.
Në atë kohë, Westcott ishte tashmë i shtrirë në shtrat dhe jetonte me Huntington’s disease, një sëmundje neurodegjenerative progresive. Sot, ai ndodhet në një qendër kujdesi për të moshuar dhe ka nevojë për kujdes të vazhdueshëm.
Djalli i tij, Court Westcott, ka thënë se procesi e ka dëmtuar rëndë gjendjen shëndetësore të të atit dhe se një ndjesë publike do të ishte e mirëpritur.
