Kanye West ka ngjallur sërish shqetësim për gjendjen e tij emocionale, pasi në një intervistë të publikuar në TikTok u shpreh se “pendohet për jetën”. Reperi po fliste me blogerin e modës Mystery Fashionist në Tokio, kur dha komentin e pazakontë që ka bërë xhiron e rrjetit.
Në videon e publikuar të enjten, blogeri e pyet me entuziazëm: “Me kë jam këtu dhe nga je?”, ndërsa Ye përgjigjet me nervozizëm: “Jam Ye, jam nga Chi”, duke iu referuar qytetit të tij të lindjes, Chicago.
Kur u pyet të vlerësonte veshjen e tij, West tha se ishte “10 nga 10”, ndërsa mbulonte fytyrën me dorë. Ai shpjegoi se çizmet ishin Yeezy, ndërsa pjesa tjetër e veshjes ishte e stilistit Gosha Rubchinskiy.
Por momenti më shqetësues erdhi kur intervistuesi e pyeti për një “trend mode” për të cilin është penduar. Pas disa sekondash heshtje, Kanye u përgjigj thjesht: “Jeta.”
[embed]https://www.tiktok.com/@mysteryfashionist/video/7574842357292616990[/embed]
Videoja, që ka mbledhur mbi 4.3 milionë shikime, është mbushur me komente të fansave të shqetësuar:
“Duket shumë i trishtuar”, ka shkruar njëri. Të tjerë kanë komentuar se ai duket sikur ka qarë apo po përpiqet të mbajë veten.
Reperi 48-vjeçar prej vitesh ka kaluar periudha të vështira dhe ka zgjedhur të jetojë kryesisht në Japoni pas vitit 2022, kur humbi bashkëpunime me Adidas, Balenciaga dhe Gap pas deklaratave antisemitike. Edhe pse kërkoi falje një vit më vonë, ai disa herë ka vazhduar me deklarata të ngjashme.
Kohët e fundit, West është përfshirë në polemika të reja, mes tyre edhe promovimi i simboleve naziste në një reklamë të Super Bowl 2024. Në maj, ai u rikthye sërish me një tjetër kërkim falje në X, duke thënë se “i do të gjithë njerëzit”.
Kanye ka katër fëmijë me ish-bashkëshorten Kim Kardashian – North, Saint, Chicago dhe Psalm. Kardashian ka deklaruar se ka qenë “kryesisht e vetme” në rritjen e fëmijëve dhe se reperi nuk i ka telefonuar prej muajsh. Aktualisht, ai është i martuar me Bianca Censori, me të cilën u lidh në dhjetor 2022.
