Lily Allen ka zbuluar detaje të reja rreth kohës dhe prapaskenave të ndarjes së saj nga aktori i “Stranger Things”, David Harbour.
Këngëtarja, 40 vjeç, u shfaq të enjten në programin “CBS Mornings”, ku foli për albumin e saj të ri West End Girl, i frymëzuar nga përfundimi i martesës katërvjeçare me Harbour, 50 vjeç. Ajo la të kuptohet se çifti është ndarë para Krishtlindjeve, pasi albumi ishte përfunduar tashmë në atë periudhë.
“Jeta ime po më shkatërrohej dhe më duhej të merresha me gjërat reale. Ishte Krishtlindje, kam dy fëmijë,” – tha këngëtarja.
Allen rrëfeu se pas përfundimit të albumit kuptoi se kishte nevojë për ndihmë profesionale dhe u dërgua vullnetarisht në një qendër trajtimi emocional.
“Kam qenë e institucionalizuar edhe më parë, por kurrë me dëshirën time. Këtë herë e dija që ajo që po ndjeja ishte shumë e rëndë. Më duhej qetësi.”
Qëndrimi i Allen në qendrën e trajtimit u bë publik në shkurt — të njëjtin muaj kur u konfirmua ndarja nga Harbour. Megjithatë, thashethemet kishin nisur që më herët, sidomos pasi këngëtarja bëri një deklaratë shqetësuese në podcast-in e saj Miss Me? në janar:
“Nuk më pëlqen asgjë. Jam vërtet në një gjendje të keqe. Kam muaj që po përshkallëzohem.”
Në atë periudhë, Harbour raportohej se ishte parë në aplikacionin e takimeve Raya, aty ku çifti ishte njohur fillimisht. Allen publikoi albumin West End Girl muajin e kaluar, të cilin e përshkroi si një “akt dëshpërimi”.
“Isha e ngecur. Ndihesha sikur nuk mund të vazhdoja me jetën time derisa këto këngë të dilnin,” – tha ajo, duke shtuar se publikimi i tij më 24 tetor ishte “çlirues”, “afirmues” dhe “shërues”.
Kur u pyet se si po e përballon fundin e martesës, Lily Allen tha se tani, një vit më vonë, është në një gjendje të shkëlqyer: “Jam duke jetuar jetën time më të mirë. Kur je në mes të dhimbjes, s'e beson kurrë që do kalojë. Por ja ku jam – më e fortë se kurrë.”
Ajo u shpreh e entuziazmuar edhe për turneun e ardhshëm muzikor, ku do ta shoqërojnë dy vajzat e saj, Ethel (13) dhe Marnie (12), që i ka me ish-bashkëshortin Sam Cooper. “Gjithçka që kam përjetuar unë, e kanë përjetuar edhe ato. Doja t’u tregoja se dhimbja mund të shndërrohet në forcë dhe art.”
