Autorja e njohur e “It Ends With Us”, Colleen Hoover, ka reaguar ashpër ndaj dramës së vazhdueshme ligjore mes aktorëve Justin Baldoni dhe Blake Lively, të cilët luajnë në përshtatjen filmike të librit të saj.
Në një intervistë për Elle, Hoover tha se ishte “plotësisht e paqartë” mbi zhvillimet, pasi ka qëndruar shumë pak në xhirime, por e quajti gjithë situatën “të pafat”, “zhgënjyese” dhe “si një cirk”.
“Ka ndikuar seriozisht në karrierat e disa aktorëve. Thjesht është e trishtueshme,” tha ajo. Ironikisht, intervista u zhvillua vetëm disa javë para se autorja të thirrej për depozitë në çështjen ligjore.
Hoover pranoi se drama e ka prekur edhe emocionalisht, sidomos për shkak të nënës së saj — një e mbijetuar e dhunës në familje dhe frymëzimi i librit.
“Tani, vetëm të mendojmë për këtë na jep PTSD,” tha ajo. “Jam pothuajse e turpëruar të them se e kam shkruar. Nuk e rekomandoj më librin.” Ajo shtoi se konflikti ka eklipsuar historinë: “Njerëzit mendojnë çfarë të duan. Askush nuk e di të vërtetën — madje as unë.”
Sipas dokumenteve të siguruara nga People, Hoover ka shprehur të njëjtat ndjenja edhe në një seri mesazhesh të vitit 2024 drejtuar Justin Baldonit, regjisor dhe aktor në film.
Në mesazhet e supozuara, ajo i shkruan:
“Artikujt e të dyja palëve janë qesharakë… i bëjnë të gjithë të duken të papjekur. Ndjehem e zhgënjyer nga veprimet e tua. Mos përdor platformën tënde për të më dëmtuar.”
Në dhjetor 2024, Blake Lively e paditi Baldonin për ngacmim seksual dhe hakmarrje, duke kërkuar 160 milionë dollarë dëmshpërblim. Baldoni mohoi akuzat dhe ngriti një kundërpadi prej 400 milionë dollarësh ndaj Lively, Ryan Reynolds dhe të tjerëve. Kundërpadia e tij u hodh poshtë në qershor, ndërsa çështja e Lively-t vazhdon.
