Meghan Markle ka bërë shaka për pauzën e saj 8-vjeçare nga aktrimi gjatë xhirimeve të filmit të ri “Close Personal Friends”.
“Po bënte shaka se ishte ndjerë pak e ndryshkur,” – ka treguar një burim për revistën People. “Por ishte e qartë që ishte përgatitur mirë dhe se për të ishte një moment i rëndësishëm të rikthehej. Dhe ishte fantastike.”
Burimi shtoi se dukesha e Sussex-it mbërriti në xhirime në studiot Amazon MGM dhe u prezantua thjesht: “Jam Meghan.”
“Gjithçka tek ajo ishte e ëmbël dhe e qetë,” – vijon burimi. “Dukej sinqerisht e emocionuar që ishte përsëri në set.”
Sipas të njëjtit burim, aktorja e serialit ‘Suits’, tashmë 44 vjeç, ishte “shumë e këndshme dhe me një energji shumë të ngrohtë.”
Markle, e cila në film luan vetveten, është parë në set në Pasadena, Kaliforni, duke buzëqeshur teksa hipte në makinë për të xhiruar një skenë pranë pishinës.
Filmi “Close Personal Friends” tregon historinë e një çifti që bëhen miq me një çift të famshëm. Në kastin e aktorëve bëjnë pjesë edhe Jack Quaid, Lily Collins dhe Brie Larson.
Ky është rikthimi i parë i Meghan në ekran pas tetë vitesh, pasi ajo u tërhoq nga Hollywood-i në vitin 2017 pas fejesës me Princin Harry.
Roli i saj i fundit ishte në serialin “Suits”, ku luajti Rachel Zane për shtatë sezone (2011–2018). Ndër projektet e tjera të saj përfshihen edhe filmat “Remember Me” (2010) dhe “Horrible Bosses” (2011).
