Millie Bobby Brown dhe David Harbour u shfaqën krah për krah në premierën botërore të sezonit të pestë të “Stranger Things” në Los Angeles, duke dhënë një mesazh uniteti pas raportimeve se aktorja kishte akuzuar kolegun e saj për ngacmim dhe bullizëm në set.
Dyshja pozoi dhe qeshi së bashku në tapetin e kuq, duke hedhur poshtë zërat për përçarje mes tyre.
“Kam një lidhje shumë të veçantë me David, sepse kemi një marrëdhënie si baba e bijë, dhe çdo skenë që kemi bërë ka qenë e mbushur me ndjesi të forta,” – tha Brown për "Entertainment Tonight*" “Në sezonin e pestë kjo shihet më shumë se kurrë.”
Nga ana tjetër, Harbour u shpreh: “E adhuroj Millie dhe jam krenar për mënyrën si është rritur dhe është bërë një artiste e jashtëzakonshme. Nuk besoj se kjo do të jetë hera e fundit që punojmë bashkë.”
Ndërkohë, krijuesit e serialit, vëllezërit Matt dhe Ross Duffer, u pyetën për akuzat në premierë. “Jemi bashkë në këtë projekt prej 10 vitesh dhe ky kast është si familje për ne. Më e rëndësishmja është që të gjithë të ndihen të sigurt dhe të lumtur në set,” – tha Matt Duffer.
Producenti ekzekutiv Shawn Levy shtoi: “Është thelbësore të krijosh një ambient pune me respekt, ku çdo person ndjehet i sigurt. Kemi bërë gjithçka për ta siguruar këtë dhe jemi krenarë për mjedisin që kemi ndërtuar.”
