Këngëtari i njohur i grupit Coldplay, Chris Martin, 48 vjeç, dhe aktorja britanike Sophie Turner, 29 vjeç, duket se po përjetojnë një romancë të re.
Sipas burimeve për Us Weekly, dyshja janë parë në disa takime në Londër, teksa mes tyre “ka shumë kimi dhe një shkëndijë të vërtetë”.
“Janë takuar disa herë në Londër. Është ende shumë herët, por kanë shumë gjëra të përbashkëta,” – tha një burim për revistën amerikane.
Të dy janë në fazën e rikuperimit pas ndarjeve të tyre të fundit. Turner, e njohur për rolin si Sansa Stark në Game of Thrones, i dha fund marrëdhënies dyvjeçare me aristokratin britanik Peregrine Pearson në fund të shtatorit. Ndërsa Martin u nda këtë verë nga aktorja Dakota Johnson, pas gati tetë vitesh lidhje dhe një fejesë.
Burime pranë çiftit zbulojnë se ata janë takuar për herë të parë disa vite më parë, kur Turner ishte ende e martuar me këngëtarin Joe Jonas, përmes miqve të përbashkët në industrinë e muzikës. “Sophie gjithmonë ka qenë një fanse e Coldplay dhe madje ka bërë shaka se dikur kishte një ‘crush’ për Chris Martin,” – shtoi burimi.
Në një video të vitit 2020, që tani po qarkullon sërish në rrjet, Joe Jonas i kishte bërë një surprizë bashkëshortes së tij për ditëlindje: një mesazh urimi nga Chris Martin. Në klip, Turner shihet e emocionuar teksa i dërgon këngëtarit një puthje përmes telefonit.
Chris Martin ka qenë më parë i martuar me Gwyneth Paltrow, me të cilën ka dy fëmijë: Apple, 21 vjeç, dhe Moses, 19 vjeç. Ndërsa Sophie Turner ka dy vajza nga martesa e saj me Joe Jonas – Willa, 5 vjeç, dhe Delphine, 3 vjeç.
