Britney Spears ka fshirë papritur llogarinë e saj në Instagram, pas disa javësh në të cilat ka qenë në qendër të vëmendjes për sjellje të çuditshme dhe të paqëndrueshme.
Të dielën, profili i saj nuk ishte më i aksesueshëm, duke shfaqur mesazhin: “Sorry, this page isn’t available to view.” Ndërkohë, llogaria e saj në platformën X (ish-Twitter) vazhdon të jetë aktive.
Ky veprim vjen vetëm pak ditë pasi Spears u filmua duke drejtuar makinën në mënyrë të rrezikshme, teksa kthehej në shtëpi pas një nate jashtë me një shoqe, në fund të muajit tetor.
Në videon e siguruar nga Page Six, 43-vjeçarja shihet duke kaluar vijën ndarëse të rrugës me BMW-në e saj të zezë, duke bërë manovra të pasigurta që shkaktuan frikë te familjarët dhe fansat.
Megjithatë, menaxheri i restorantit “Red O” në Westlake, Kaliforni, ku Spears kishte darkuar më herët atë mbrëmje, deklaroi se ajo nuk ishte e dehur.
“Ishte shumë e qetë dhe e sjellshme,” – tha Oliver Wynn për Us Weekly.
“Vetëm hëngri diçka, bisedoi me shoqen dhe u largua. Ishte shumë më e sjellshme se shumë të famshëm që kam parë.”
Pas publikimit të videos, Spears reagoi në mënyrë të çuditshme në Instagram, duke shkruar:
“Nëse dikush po pyet, ajo që shihni në video nuk jam unë.” Por më pas, ajo fshiu llogarinë pa dhënë asnjë shpjegim të mëtejshëm.
Sipas burimeve të afërta me familjen e saj, sjelljet e fundit të Spears i kanë kujtuar atyre periudhën e errët të vitit 2007, kur ajo pati një krizë nervore publike, rruajti kokën dhe humbi kujdestarinë e djemve të saj, Sean Preston dhe Jayden James, të cilët i ka me ish-bashkëshortin Kevin Federline.
“Ka shumë shqetësim. Të gjithë duan më të mirën për të, por ajo po merr vendime të këqija,” – tha një burim për Daily Mail.
“Është e frikshme, dhe po diskutohet çfarë mund të bëhet për ta mbrojtur nga vetja.”
