Bashkimi Europian tha se është i gatshëm të kundërpërgjigjet pasi Presidenti amerikan Donald Trump kërcënoi të vendosë tarifa 30 për qind ndaj bllokut.
Në një letër dërguar Presidentes së Komisionit Europian, Ursula von der Leyen, të premten dhe të publikuar në Truth Social të shtunën, Trump shkroi: “Duke filluar nga 1 gushti 2025, do t’i vendosim Bashkimit Europian një Tarifë prej vetëm 30 për qind mbi produktet e BE-së të dërguara në Shtetet e Bashkuara, e ndarë nga të gjitha Tarifat Sektoriale.”
Presidenti shtoi: “Nëse për ndonjë arsye vendosni të rrisni tarifat tuaja dhe të kundërpërgjigjeni, atëherë, çfarëdo numri që zgjidhni për t’i rritur, do t’i shtohet 30 për qindëshit që ne vendosim.”
Në një deklaratë që vuri në dukje me ton të ftohtë letrën e Trump, Ursula von der Leyen tha se BE-ja ishte e gatshme të vijonte bisedimet me SHBA-në, por gjithashtu po shqyrtonte “masa proporcionale.”
“Do të ndërmarrim të gjitha hapat e nevojshëm për të mbrojtur interesat e BE-së,” tha von der Leyen. “Vendosja e tarifave prej 30 për qind ndaj eksporteve të BE-së do të ndërpriste zinxhirët jetikë të furnizimit transatlantik, në dëm të bizneseve, konsumatorëve dhe pacientëve në të dy anët e Atlantikut.”
Stafi i Komisionit u urdhërua papritur të anulojë planet e fundjavës dhe të paraqitet për detyrë, ndërkohë që kryeqytetet kombëtare hynë menjëherë në modalitet krize për të vlerësuar hapat e radhës.
Pesë diplomatë të BE-së konfirmuan se ambasadorët do të mblidhen të dielën në orën 15:30 për bisedime urgjente, përpara takimit të ministrave të tregtisë të bllokut në Bruksel të hënën.
Ende nuk është vonë
Në një deklaratë, zyra e Kryeministres italiane Giorgia Meloni u shpreh se ka ende kohë për t'i shmangur tarifat amerikane.
“Është thelbësore të përqendrohemi tani te negociatat, duke shmangur polarizimin që do ta bënte më të vështirë arritjen e një marrëveshjeje,” deklaroi Palazzo Chigi. Sipas saj, një marrëveshje është e nevojshme për të forcuar aleancën perëndimore:
“Sidomos në mjedisin aktual — nuk do të kishte kuptim të nxisnim një luftë tregtare mes dy anëve të Atlantikut.”
BE-ja ishte angazhuar një marrëveshje paraprake për të fiksuar një tarifë bazë prej 10 për qind për mallrat që hynin në SHBA nga Europa. Gjithashtu, kërkonte lehtësira për sektorë specifikë, përfshirë makinat, avionët dhe pijet alkoolike.
Kryeministri irlandez Micheál Martin, në përgjigje të kërcënimit tregtar të Trump, i dha “mbështetjen e plotë” von der Leyen-it dhe kryenegociatorit të saj për tregtinë, Maroš Šefčovič. Ai tha se preferenca e tij e qartë ishte për “një zgjidhje të negociuar që shmang përshkallëzimin.”
“Shpresoj që negociatat të vazhdojnë gjatë javëve në vijim dhe të jenë të suksesshme,” shtoi Martin. Irlanda, si eksportuesi kryesor i produkteve farmaceutike drejt SHBA-së, është veçanërisht e ekspozuar ndaj çdo përshkallëzimi të tensioneve tregtare.
Koha po shkurtohet
Megjithëse koha po kalon, diplomatët europianë thanë se ende ka kohë për të shmangur një luftë tregtare në shkallë të plotë.
“Letra mund të lexohet si një dekret, por të gjithë do të vërejnë datën 1 gusht,” i tha një diplomat POLITICO-s.
“Nëse do të ishte vërtet një dekret, do të hynte në fuqi nesër. Kjo na jep tre javë për negociata, të cilat ishin tashmë në një fazë shumë të avancuar.”
Një raund i parë tarifash hakmarrëse të BE-së ndaj importeve amerikane me vlerë 21.5 miliardë euro pritet të hyjë në fuqi në orën 00:01 të së martës. Blloku gjithashtu po shqyrton kundërmasa të mëtejshme që do të mbulonin rreth 70 miliardë euro mallra amerikane.
Një tjetër diplomat, i cili foli në kushte anonimiteti për shkak të ndjeshmërisë së çështjes, shtoi se shtyrja e zbatimit të raundit të parë të tarifave hakmarrëse deri më 1 gusht do të kishte kuptim për të ndihmuar negociatat, ndërsa BE-ja përgatit ndërkohë paketën e dytë.
Në letrën e tij, Trump la të hapur mundësinë për rregullime të mëtejshme të tarifave të kërcënuara nëse BE-ja hapte “Tregjet e saj të mbyllura deri më tani për Shtetet e Bashkuara, dhe eliminonte Tarifat, Politikat Jo-Tarifore dhe Pengesat Tregtare … Këto Tarifa mund të ndryshohen, në rritje ose ulje, në varësi të marrëdhënies sonë me vendin tuaj.”
Në deklaratën e saj, von der Leyen hodhi poshtë akuzën e përsëritur në letrën e Trump se SHBA-ja po trajtohej padrejtësisht nga blloku.
“Shumë pak ekonomi të tjera në botë janë kaq të hapura dhe kaq të ndershme në praktikat tregtare të Bashkimit Europian,” tha ajo./Politico.eu
