Deputetët e Kuvendit të Kosovës do të mblidhen sot për herën e 46-të për konstituim të Kuvendit në orën 11:00.
Procesi i konstituimit ka ndaluar te pika e zgjedhjes së kryetarit. Kjo pasi Lëvizja Vetëvendosje, si partia fituese e dalë nga zgjedhjet, ka propozuar Albulena Haxhiun si kryetare. Opozita e deritanishme nuk e ka përkrahur nga fillimi këtë kandidim, porse VV-ja nuk po heq dorë.
Në mungesë të numrave ata kanë propozuar që votimi nga i hapur të kalojë në të fshehtë.
Komisioni që mundëson votimin e fshehtë nuk po mbështetët nga Partia Demokratike e Kosovës, Lidhja Demokratike e Kosovës, Aleanca për Ardhmërinë e Kosovës. Kjo çështje madje është dërguar në Gjykatën Kushtetuese, e cila ka dhënë aktgjykimin e saj, por i njëjti po interpretohen në mënyra të ndryshme nga subjektet politike.
Kushtetuesja ka sjellë aktvendim sipas të cilit legjislatura e nëntë ka një muaj afat për konstituim, zgjedhjen e kryetarit dhe nënkryetarëve.
PDK dhe AAK i kanë kërkuar LVV-së që ta ndërrojë kandidaten për kryetare të Kuvendit me arsyetimin se ka punuar në dëm të interesave të shtetit. Kurse, LDK ka deklaruar se nuk do ta votojë asnjë kandidatë.
Këto parti kanë thënë se Lëvizja Vetëvendosje, Guxo e Alternativa nuk kanë as votat për formimin e Qeverisë, për çka kanë thënë se nevojitet marrëveshje politike. Megjithatë, në LVV kanë thënë se kjo duhet provuar duke votuar fillimisht konstituimin e Kuvendit.
Ndërkohë, PDK dhe LDK iu ka drejtuar sërish Gjykatës Kushtetuese që të sqarojë nëse seancat e fundit kanë shkelur Kushtetutën. Gjithashtu, edhe presidentja Vjosa Osmani ka paralajmëruar se së shpejti do t’i dërgohet Kushtetuese se cilat janë masat që duhet të merren nëse nuk konstituohet Kuvendi deri më afatin e paraparë prej një muajsh.
Zgjedhjet parlamentare janë mbajtur më 9 shkurt dhe mbledhja e parë për konstituimin e Kuvendit të ri është mbajtur më 15 prill. Që nga ajo datë, çdo 48 orë po mbahen vazhdime të seancës konstituive, por pa arritur ndonjë rezultat konkret.
