Një 28-vjeçar ka inskenuar rrëmbimin e vet për të përfituar para nga babai, por përfundoi në pranga bashkë me bashkëpunëtorin. Policia njoftoi se “mashtroi babain duke inskenuar rrëmbimin e vet për të përfituar para, vihet në pranga 28-vjeçari. Arrestohet edhe bashkëpunëtori i tij, i cili do të merrte shumën e kërkuar.”
Në pranga kanë përfunduar Lubjan Camema, 28 vjeç, banues në Kavajë, dhe Bernard Kiptiu, 45 vjeç, banues në Durrës.
Sipas Policisë:
“Nga veprimet hetimore rezultoi se shtetasi L. C. kishte mashtruar babain e tij, shtetasin B. C., duke i thënë se ishte rrëmbyer dhe se për lirimin e tij kërkohej një shumë eurosh. Shtetasi B. K. u kap në flagrancë në lagjen nr. 16 të qytetit të Durrësit, duke i kërkuar shtetasit B. C. shumën e parave, me pretendimin se do të shërbenin për lirimin e djalit të tij.”
Në kulmin e “negociatave për shpëtimin”, policia ndërhyri dhe arrestoi Kiptiun në momentin që po kërkonte shumën nga babai i 28-vjeçarit. Vetë Camema u gjet rreth 100 metra larg vendit të ngjarjes dhe u ndalua menjëherë.
Hetimet zbuluan se dy ditë para skemës së mashtrimit, Camema kishte marrë automjetin e të atit dhe dyshohet se e ka shitur.
Të dy personat do të përballen me akuzën për veprën penale “Mashtrimi”, kryer në bashkëpunim.
