Valbona Xha Zejno, 54 vjeçe, ka humbur jetën pas një ndërhyrjeje kirurgjikale për ngushtimin e stomakut në një klinikë private pranë spitalit rajonal. Ndaj mjekut kirurg Ilir Shani është nisur procedim penal për “neglizhencë në trajtimin mjekësor”, ndërkohë që ai është në hetim në gjendje të lirë.
Sipas familjarëve të viktimës, të cilët kanë bërë denoncimin, ndërhyrja është shoqëruar me pak informacion dhe mungesë transparence për gjendjen e pacientes. Ndërkohë, prokuroria e Durrësit po vijon hetimet për të sqaruar nëse problemet kardiake të 54-vjeçares janë marrë në konsideratë përpara operacionit.
Kodi Penal parashikon dënim deri në 2 vjet burg për raste të tilla, kur neglizhenca mjekësore çon në vdekje.
Mjeku Ilir Shani, i cili ka kryer ndërhyrjen, ka reaguar pas ngjarjes, duke sqaruar se operacioni ka përfunduar me sukses dhe se gjendja e pacientes ishte e mirë deri në mëngjesin e ditës tjetër, kur ajo pësoi një arrest kardiak fatal.
“Pacientja iu nënshtrua ndërhyrjes më 20 maj. Operacioni përfundoi normalisht, ajo u transferua në pavijon në gjendje të mirë dhe u monitorua rregullisht. Ajo ishte aktive, lëvizte dhe komunikonte pa shqetësime. Fatkeqësisht, në agim të datës 21, ajo pësoi një arrest kardiak të menjëhershëm, pasojë e një infarkti akut masiv. Përpjekjet për ta shpëtuar nuk patën rezultat” shkruan ai.
Në reagimin e tij publik, Shani thekson se ndan dhimbjen me familjen dhe garanton bashkëpunim të plotë me autoritetet për zbardhjen e kësaj ngjarjeje tragjike.
