Në një deklaratë nga selia blu, nga ku komentoi operacionin e një dite më parë të udhëhequr nga SPAK, Sali Berisha akuzoi publikisht kreun e prokurorisë së posaçme, Altin Dumani, për sabotim të qëllimshëm të operacioneve të përbashkëta me Antimafian italiane, për interesa elektorale të Partisë Socialiste dhe për të mbrojtur eksponentë të krimit të organizuar, përfshirë të shumëkërkuarin Elvis Doçi, i njohur si “Vis Poja”.
“Ça mendoni ju se Antimafia Italiane e bëri për qëllime elektorale vonesën? Jo! Ja ka vonuar Dumani për qëllime elektorale Antimafias italiane. Ka mashtruar Antimafian Italiane, si ordiner.” – deklaroi Berisha me tone të rënda në një konferencë për mediat.
Sipas liderit të opozitës, Altin Dumani ka kërkuar vetë shtyrjen e operacionit ndërkombëtar për të mos “prishur punë” gjatë fushatës zgjedhore, duke i dhënë kohë figurave të rëndësishme të botës së krimit të arratisen.
“Se "kemi operacionin tani", se "duhet ta ndjekim", se "na prish punë" e kaq e aq. Dhe Poja çau ferrën. Kush e njoftoi Elvis Doçin? Edhe të tjerët… Kush i njoftoi?” – u shpreh Berisha me një retorikë akuzuese, duke aluduar për një bashkëpunim të heshtur mes drejtësisë dhe strukturave të krimit.
Në fjalën e tij, Berisha e quajti Edi Ramën “kreun e organizatës kriminale” dhe e akuzoi për drejtimin e një sistemi që, sipas tij, funksionon mbi aleancën e pushtetit me botën e nëndheshme.
“Edhe ato shishet 36 mijë euro me kë i pinte kujtoni ju? Me kë i hapte? Këtu bota e krimit ka kreun e organizatës, ky është Edi Rama.” – theksoi Berisha.
Si zakonisht, Berisha nuk e kurseu as një goditje për “lakenjtë e pushtetit” në media: “I them këto fjalë për të gjithë ato lakenj që nga mëngjesi deri në darkë bëjnë avokatin e farsës së turpshme ndaj popullit të tyre dhe të moralit njerëzor, faqezinj që dalin nga një studio në tjetrën për të bërë avokatinë e rrëmbimit të zgjedhjeve. Kjo është turp!”
