Vjen një pikë e sezonit dhe kthehen historitë e vjetra. Askush nuk nxjerr mësim nga vitet e mëparshme, edhe pse kostot mund të jenë të rënda. E thënë kjo sidomos kur luan për mbijetesë, apo kur luhen arkëtimet nga kompeticionet e UEFA-s. E atëherë cfarë ndodh? Ndodh ajo që ngatërrohen fushat, komplikohen situatat dhe bëhen rrokada që çorodisin tifozët.
E kështu në Loro Boriçi, tani e gjykuan se është momenti për të mbjellë barin e fushës. E për të mos humbur shumë takime me tifozët e shtëpisë në mbështetje ranë dakord me Tiranën për këmbimin e fushës. Kështu, gati rrokada. Klasikja do të zhvillohet jo në Shkodër, por në kryeqytet. E sikur të mos mjaftojë, FSHF aprovon edhe një lëvizje dite, nga e shtuna në të dielë. Bardhebluve i leverdis rrokada, sepse janë në krye të renditjes por shumë afër me rivalët. Kështu që, se e luajtën në shtëpi këtë herë ndeshjen, mirë i bën. Vllaznia është ajo që duhet ta vuajë faktin se po shkon për një transfertë të dytë radhazi kundër kryesuesve. Duke anashkaluar hipotezën se mund të 'vrasë' shpresat për titull me këtë ndeshje.
HUMBJA E NOCIONIT 'SHTËPI'
Elbasan Arena është i padisponueshëm për të njëjtën arsye. Kështu Partizani kthehet të luajë për herë të dytë në shtëpinë e tij të re dhe të parën në kampionat kur të presë Bylis. Kjo gjë natyrisht që pritej edhe pse jo të gjitha detajet janë gati në impiantin e ri të të kuqve.
E duke mbetur te fushat, Niko Dovana mbyll dyert për rikonstruktimin e fushës. Edhe sezonin e kaluar durrsakët e bënë pothuajse në të njëjtën periudhë investimin në infrastrukturë. Kështu, kundër Erzenit, të hënën, durrsakët do të luajnë në Egnatia Arena të Rrogozhinës. Larg tifozëve që mund të ishin një mbështetje e rëndësishme në gjendjen që po kalon ekipi, por kjo pak rëndësi ka: për dështimet ka kush bëhet fajtor.
