Ndërsa Partia Demokratike është në fazën post-traumatike të dyluftimit të brendshëm, një dorë e shtrirë nga Partia Socialiste që kërkon emra kandidatësh për president, ka trazuar sërish ujërat e selisë blu. Logjika e zhvesh ftesën nga sinqeriteti i bashkëpunimit. Socialistët mezi ç’presin të largohet Ilir Meta, për faktin se ky e shndërroi presidencën në seli të opozitës. Atëherë pse e kërkojnë një president të pranuar nga opozita, që mund të flirtojë me palën tjetër, në kërkim të balancave?
Pavarësisht kontradiktave, tre socialistë janë aty. Balla, Gjiknuri dhe Spiropali, të gatshëm për të folur dhe në pritje të negociatorëve përballë. Këtu fillon dhe mbaron misioni i tyre. Mjafton të jenë prezent në tryezën e bisedimeve dhe sherri brenda opozitës riaktivizohet menjëherë.
“Dua të sqaroj se nuk ka pasur asnjë negociatë me asnjë grupim, kemi zhvilluat takime mes vetes sonë” ka konfirmuar Damian Gjiknuri.
Kush do të negociojë nga opozita për presidentin e ri? Fitilat e sherrit ndizen shpejt brenda PD-së. Berisha fillimisht refuzoi të bëhet pjesë e lojës. Pastaj la një shteg të hapur.
“Nëse Rama vendos që presidentin ta propozojë PD ose opozita atëherë do të nisim konsultimet me institucionet e PD” tha ai, nga selia që ka marrë nën kontroll.
Nga ata pak që i kanë mbetur Bashës, pati pakënaqësi. Enkelejd Alibeaj, që ruan ende postin e kryetarit të grupit parlamentar tentoi të faktorizohet.
“Qendrimet personale të askujt, aq më tepër të atyre që nuk janë pjesë e grupit parlamentar të PD nuk kanë kurrfarë lidhje me qëndrimin dhe vendimarrjen e grupit parlamentar” u shpreh Alibeaj.
Por socialistët që kur bënë ftesën e kishin të qartë adresën.
Kur i pyesin për Berishën, socialistët përmendin menjëherë të vdekurit, duke mbyllur çdo shteg për negociata. Rama iu përgjigj shkurt gazetarëve: “Unë flas për të gjallët, ju më përmendni të vdekurit”.
“Ne do bëjmë përpjekje të komunikojmë me të gjitha copat dhe çikat që janë aty, se jo me çdo copë dhe çikë kemi ndërmend të komunikojmë. Do komunikojmë me ata copa dhe çika që përfaqësojnë të gjallët” -u shpreh ai në një konferencë nga kryeministria.
Duket se dora e socialistëve është e shtrirë drejt palës më të dobët në Partinë Demokratike. Dhe kjo nuk është rastësi. Pas vendimit të gjykatës që i dha selinë dhe logon Grupit të Rithemelimit, Berisha është rikthyer triumfator.
Lulzim Basha i dorëhequr është nisur drejt takimeve në fshatra.
Pikërisht kur sherri filloi të venitej, Rama vendos të njohë si palë negociatore Lulzim Bashën, duke e faktorizuar sërish. Emrat që mund të qarkullojnë nga opozita për kandidatët për president mund të digjen shpejt, por misioni është përmbushur. Njëra palë është shumicë brenda demokratëve, por pala tjetër mbetet zyrtarisht në komunikim me qeverinë./Lapsi.al
