Duket sikur gjithcka shkon drejt ndjesive të teknikut, që qendron indiferent ndaj mundësisë për tu përforcuar, me mendimin se organika e tij vlen dhe se në janar është e vështirë të gjejë elementë që të bëjnë diferencën në krahasim me lojtarët që Josa ka aktualisht në dispozicion. Që shpresat për vazhdimin e sezonit në nivele të larta nuk do t’i varte në merkaton e janarit Mirel Josa e kishte bërë të qartë edhe përpara se dritarja dimërore të hapej.
Megjithatë, drejtuesit bardhezinj nuk është se kanë qendruar palëvizur, por deri tani sistemi i indikatorëve të merkatos ka mbetur në fazën e vëzhgimit, për të gjetur profile që mund ti interesojnë Lacit. Kërkohet një anësor i fortë, në mënyrë që Zarubica e Mazrekaj, të vetmit e rolit, të mund të marrin frymë ose të alternohen, pa qenë e nevojshme që Ziko të sakrifikohet në një pozicion jo natyral sa herë që duhet zëvendësuar një prej të dyve.
Kërkimet deri tani nuk kanë sjellë asnjë identikit për tiu servirur Josës, që vazhdon i qetë stërvitjen me të gjithë grupin pa u shqetësuar për merkaton. Natyrisht është vetëm java e parë e janarit dhe gjërat mund të ndryshojnë, por deri tani tekniku nuk është ulur të studiojë asnjë lojtar, në pritje për të gjetur të duhurin, që sipas të gjitha informacioneve që vijnë nga klubi kurbinas duhet të vijë nga merkato ballkanase.
