“Ai gol nuk mund të anulohet kurrsesi se nuk kishte asnjë lloj elementi për faull. E kam parë shumë herë dhe nuk shoh asnjë gjë për faullin, nuk e kuptoj se çfarë është, prekja me dorë apo çfarë?" Safet Gjici nuk përmbahet në përfundim të ndeshjes së humbur me Lacin 1-2, në të cilën iu anullua një gol në fundin e shtesës së pjesës së parë. Presidenti i Kukësit ndalet pikërisht te ai episod duke akuzuar arbitrin për njëanshmëri: "Për gabimin individual të mbrojtjes u pësuan golat e parë, jam dakord. Por të thuash që ai gol duhej anuluar, nuk e di, nuk e kuptoj ku ishte faulli. Përkundrazi, lojtarët e Laçit bënin mundje".
Numri 1 i Kukësit shtyhet edhe më tej, duke anashkaluar faktin se pikërisht gjyqtari që konteston i akordoi një penallti në minutën e fundit të kohës së rregullt, që më pas u gabuan nga Hila, duke lënë në fuqi rezultatin 1-2 për kurbinasit: "Por Kridensi gjithmonë është laçian. Po ta shohësh treshen kush arbitron Laçin, e kuptoni që të tre arbitrat me emër e mbiemër kështu e kanë bërë".
Gjici del në mbrojtje të Longos, tepër agresiv në lidhje me situatën e krijuar: "Ai është trajner i huaj, e kam lënë të qetë në punën e vet, po e bën mirë. Nuk po kuptoj sulmin ndaj një trajneri të huaj që po bën punën e vet. Deklaratat e tij ndoshta edhe mua nuk më pëlqejnë por ka edhe ai strategjinë e vet - tha Gjici -. Ai ka të drejtë që thotë që goli është i rregullt. Nuk ia ka kush fajin te penalltia që u gabua. Aty u dëmtua Kukësi kur pësuam golin e parë, se erdhi i dyti, etj. Këto janë gjëra për t’u analizuar. Nuk është hera e parë që kemi humbur në këtë mënyrë, ka ndodhur edhe herë të tjera”, përfundoi presidenti i Kukësit.
