Evangjeli Veli nuk e ka nisur në mënyrën më të mirë të mundshme paraqitjen e saj në Kampionatin Botëror, që po zhvillohet në Tashkent të Uzbekistanit. Edhe pse pritshmëritë ishin ndryshe, Veli në baterinë A të peshës deri në 55 kilogram, ka mundur të klasifikohet vetëm në shkëputje, por edhe aty pa ndonjë rezultat impresionues. Provën e parë e ka të suksesshme me 86 kilogram. Më pas e tillë është edhe në të dytën, me 89 kilogram, por nuk realizon provën e tretë me 91 kilogram, për vendin e pestë në këtë disiplinë.
Në shtytje tentoi në provën e parë 105 kilogram, por nuk ia doli, e ndoshta këtu u kondicionua gara. Edhe në të dytën, përsëri me 105 kilogram, përfundimi nuk ishte i mire, duke e detyruar të tërhiqet nga gara. Kjo situatë bëri që të humbasë renditjen në shtytje e në dygarësh.
Dita e së premtes ka pritshmëritë e mëdha, sepse në Baterinë A të peshës 73 kilogram do të jenë Briken Calja dhe Erkand Qerimaj, gjithçka në ora 15:00. Dhe gara e shqiptarëve përfundon të hënën me konkurrimin e Krenar Shorajt dhe Daniel Godellit në ora 12:30 në Baterinë B të peshës 89 kilogram. Kampionati Botëror i të rriturve në Peshëngritjes përfundon më 17 dhjetor.
