Më 12 janar, pas 12 vitesh, skadon skualifikimi i dopingut për Francesco Flachi, i cili, i intervistuar nga Repubblica, feston: "Më në fund do të jem në gjendje tia filloj nga e para". Flachi u skualifikua kur luante për Brescia, pasi rezultoi pozitiv për kokainë pas ndeshjes me Modenan. "Bota u shemb mbi mua. Nuk kërkoj justifikime, nuk i kam kërkuar kurrë, kam bërë një gabim dhe kam paguar. Por atje, në atë moment, unë rashë në errësirë. M’u deshën pesë vjet për të gjetur veten. Pas skualifikimit nuk doja të dija më për futbollin. Hapa një dyqan paninesh, u përpoqa të shpikja një jetë tjetër, por kur e ke topin përbrenda, herët a vonë të shfaqet. Pra, pas atyre pesë viteve të zbrazëti u afrova ngadalë”.
Deri në pikën që tani, në moshën 46 -vjeçare, ai do të kthehet të luajë, me Signa, në kampionatin e Eccellenza. "Sigurisht që nuk kam nëntëdhjetë minuta në këmbët e mia dhe nuk kam as sprintin që kisha dikur, por jam ende pesë muaj larg nga kthimi në fushë dhe mendoj se mund të kthehem në formë. E di, dje filluam stërvitjen dhe kur mbërrita në fushë isha i emocionuar. Është një sfidë me veten time, një revansh personal. Ideja lindi për argëtim, presidenti i Signa më provokoi: sipas mendimit tim nuk mund të luash. Dhe në fund pranova. Mendoj se mund të jem një pikë referimi për të rinjtë dhe ndoshta edhe të jem një stimul për t'u përmirësuar ".
Flachi nuk do të ketë numrin e tij 10: "Jo, jo, do të ulem në stol, dhe nëse trajneri e sheh të arsyeshme do të futem në fushë. Por më parë janë djemtë, fanellat nga 1 deri në 11 janë zënë tashmë". "Kam bërë shumë k**lliqe, gabime në jetën time, por sot jam një njeri tjetër, i ndryshuar, gati të kthehem në lojë. Tani do të bëj këto 6 muaj me Signa e pastaj dua të marr licencën e trajnerit. Kjo është rruga ime. Dua të stërvis fëmijët", përfundoi ai.
