Lionel Messi është në qendër të vëmendjes dhe kjo është e kuptueshme. Jehona e lëvizjes së tij të bujshme nga Barcelona te PSG është ende e fortë. Madje, edhe në botimin e një libri është folur për një sjellje të veçantë që karakterizon argjentinasin gjatë ndeshjeve.
Gazetari britanik Simon Kuper, i cili merret me rubrikat sportive në Financial Times dhe bashkëpunon me media të ndryshme ndërkombëtare, kohët e fundit botoi një libër të titulluar "The Barcelona Complex: Lionel Messi and the Creation - and the Deconstruction - of the Greatest Football Club" (Kompleksi i Barcelonës: Lionel Messi dhe Krijimi - e shkatërrimi - i klubit më të madh të futbollit), në të cilën zbulohet një episod kurioz i lidhur me sulmuesin argjentinas. Sipas raportimit të Kuper, Messi gjatë 5 minutave të para të çdo ndeshje ecën nëpër fushë, sheh me vëmendje secilin nga kundërshtarët e tij dhe kontrollon se ku pozicionohen.
Mund të thuhet se ky zakon i veçantë është një fazë përgatitore për zhvillimin e ndeshjes. Pep Guardiola, trajneri i Messit mes viteve 2008 dhe 2012, kishte treguar më parë diçka të ngjashme duke përshkruar Messin: "Pas pesë, dhjetë minutash, ai ka një hartë në sytë dhe trurin e tij, për të ditur saktësisht se ku janë hapësirat".
