'Episodi' i ri i përgjimeve telefonike të presidentit të Real Madrid Florentino Perez ka tronditur edhe më shumë botën e futbollit dhe në vecanti atë madrilene . 'El Confidencial' ka publikuar biseda të tjera që datojnë që nga viti 2012. Në fjalitë e raportuara nga media, Perez përdor tone të ashpra ndaj José Mourinhos dhe Cristiano Ronaldos, të cilët ishin të dy në Madrid në atë kohë. Sulmuesi "është një i çmendur. Ky djalë është një idiot, një njeri i sëmurë. Dikush mendon se ky djalë është normal, por ai nuk është, përndryshe ai nuk do të bënte të gjitha gjërat që bën".
Në frazat e publikuara, Perez sulmon gjithashtu agjentin e fuqishëm Jorge Mendes: "Ai nuk komandon mbi të. Ashtu si nuk komandon mbi Mourinhon. Zero. Këta janë njerëz me ego të tmerrshme, të dy të llastuar, trajneri dhe ai, dhe ata nuk e shohin realitetin, sepse të dy mund të përfitonin shumë më shumë nëse nuk do të ishin të tillë. Këta janë dy anormalë, sepse ne po flasim për shumë para në fushën e të drejtave të imazhit. Për më tepër, me atë fytyrë që ata kanë, me atë mënyrë mospërfillëse, që jo të gjithëve i pëlqejnë...".
