Komiteti Ekzekutiv i Uefa ka miratuar sot disa rregulla të veçanta për fazën finale të Euro 2020 "në mënyrë që të sigurojë mbarëvajtjen dhe vazhdimin e kompeticionit në dritën e pandemisë Covid-19". Ashtu si ishte kërkuar nga trajnerë të shumtë, është tashmë zyrtare që lista e lojtarëve do të shkojë nga 23 në 26. Sidoqoftë, një maksimum prej 23 lojtarësh (përfshirë tre portierë) mund të qendrojnë në pankinë.
Sapo të jetë prezantuar lista e lojtarëve në 1 Qershor 2021, legjislacioni aktual lejon zëvendësime të pakufizuara të saj në rast të një dëmtimi të rëndë ose sëmundje para ndeshjes së parë, me kusht që zëvendësimet të jenë të çertifikuara nga pikëpamja mjekësore. Për të qartësuar atë që është rasti më i mundshëm, lojtarët që kanë rezultuar pozitivë për Covid ose që janë deklaruar si "kontakte të ngushta" të një personi të infektuar, dhe për këtë arsye janë vendosur në izolim, konsiderohen raste të sëmundjes serioze dhe për këtë arsye mund të zëvendësohen para ndeshjes së parë me miratimin e Uefa.
Rregullorja e re tani do të lejojë gjithashtu zëvendësimin e portierëve para çdo ndeshje gjatë turneut në rast të paaftësisë fizike, edhe nëse një ose dy portierë në listën e lojtarëve janë akoma në dispozicion. Për të siguruar integritetin e kompeticionit, një lojtar i cili është zëvendësuar në listë padyshim që nuk mund të rikthehet.
