Pas thirrjeve të Lulzim Bashës dhe Monika Kryemadhit për mosbindje civile, dy deputetë të LSI-së kanë dhënë shenjat se nuk janë dakort me qëndrimet ekstreme të opozitës.
I pari ishte Edmond Haxhinasto ish ministri që ka shkuar të marrë pjesë në mbledhjen e Komisionit të Ekonomisë.
Në një kohë që nga opozita vijnë thirrjet për të mos paguar faturat e energjisë elektrike dhe të ujit, duket se qëndrimi i Haxhinastos shpreh kundërshtimin e tij ndaj qëndrimit të opozitës për taksën e Rrugës së Kombit.
Një tjetër deputet që ka dalë hapur kundër thirrjeve për mosbindje civile është Robert Bitri, që në një prononcim për Report Tv ka thënë:
“Lulzim Basha nuk është kryetar i partisë sime dhe nuk jam dakord për mosbindje civile”
Mbrëmjen e djeshme, kryetari i PD, Lulzim Basha, pas një takimi të zgjeruar të opozitës parlamentare dhe të strukturave drejtuese të të gjithë partive opozitare në Shqipëri, deklaroi se "kemi dalë me një vendim unanim; në krah të qytetarëve shqiptarë. Hapësira e vetme për t’i qendruar në krah qytetarëve është mosbindja qytetare dhe kjo nis që këtë javë, në krah të qytetarëve me mosbindjen qytetare, me refuzimin jo vetëm të taksës në rrugën e Kombit por të çdo takse tjetër që ka rritur Edi Rama, me të gjitha hapat, format dhe mënyrat e mosbindjes qytetare si forma më e lartë e veprimit politik dhe qytetar kundër një klike që ka zaptuar pushtetin dhe po vjedh dhe po varfëron vendin, po asgjeson shpresën dhe po zbras Shqipërinë. Ne këtë nuk mund ta pranojmë."
