Mesditën e sotme u gjet një varkë e braktisur në plazhin e Zvërnecit në Vlorë. Dyshimet e para flasin për persona të mbytur, ndërsa më vonë mjeti lundrues është nxjerrë nga dallgët në bregun e detit.
Brenda varkës është gjetur edhe një letër që ngre dyshime të forta për këtë pistë. “Unë jam Landi, po mbytemi. Nuk kam më kohë. Nënë Jorgjia të kujdeset për fëmijët. Lekët i keni tek pllakat e fundit të banjos”,- shkruhet në letër.
Policia e Vlorës po heton për të bërë të mundur identifikimin emrave të mundshëm të gjetur në letër. Por gjithashtu kjo histori mund të lidhet edhe me personin tjetër Santo Ymeraj, që u zhduk ditën e enjte teksa përpiqej të lundronte drejt Italisë. Kjo për faktin se të dy personat mund të jenë zhdukur në të njëjtën ditë.
