Edhe pas lirimit nga burgu të Fran Frrokajt, kreu i Partisë Demokratike nuk është nxituar të flasë për pafajësinë e kryebashkiakut të Lezhës, por Basha dha disa shembuj që tregojnë se drejtësi nuk ka.
Rasti i parë ishte i Elvis Rroshit që dyshohet se u përfshi në një rast të ngjashëm të tjetërsimit të pronave në Spille, por nuk u arrestua. Rast tjetër sipas Bashës është ai i Erion Veliajt që po tjetërson pronën e Teatrit Kombëtar dhe së fundmi, rasti në Fier kur prona publike po tjetërsohet për të ndërtuar inceneratorët.
“Nuk kam marrë kurrë përsipër të gjykoj apo të jap vlerësimet e mia për vendimet e gjyqësorit, por drejtësi është ajo që funksionon e barabartë. Pse nuk është arrestuar Elvis Rroshi? Pse nuk është ndjekur i njëjti standart për të njëjtat akuza, për dhjetëra pushtetarë socialist? Erion Veliaj po tjetërson pronë publike në qendër të Tiranës, te Teatri Kombëtar bashkë me Edi Ramën. Në Fier po tjetërsohet prona për të favorizuar inceneratorët e Ben Ahmetajt. Pse nuk bëhet drejtësi për këta?” tha Basha, sipas të cilit drejtësia tani është e kapur nga narko-shteti.
Deklarata e Lulzim Bashës u bë pas mbledhjes së grupit parlamentar të Partisë Demokratike.
