Ministrja e Mbrojtjes, Olta Xhaçka ka mbrojtur kolonelin Artur Meçollari që tashmë është pjesë e grupit negociator për kufirin detar përballë akuzave të opozitës që e akuzon për spiun të shërbimeve të huaja. Xhaçka shpjegoi se sulmi i Berishës e ka zanafillën në planet e ish kryeministrit për t’ia kaluar bazën e Bisht Pallës biznesmenëve pranë tij. Në këtë pikë, Xhaçka përmendi Damir Fazlliçin, serbo-boshnjakun që duket se ia kishte vënë syrin bazës ushtarake për të bërë biznes 6 vite më parë.
“Meçollari nuk pranoi të firmoste për heqjen e disa bazave detare nga plani i përhapjes. Nuk pranoi t'ua jepte bazat detare, miqve dhe familjarëve të doktorit kryeminister. Sulmi ndaj Mecollarit kur shtypi shkruante për megaaferat me bazën e Bisht Pallës, kur shtypi shkruante për shitblerjen e pronave në Porto Romano mes familjarëve të Berishës me Damir Fazllic” u shpreh Ministrja e Mbrojtjes që e konsideroi sulmin “një hakmarrje personale, që nuk kishte të bënte me agjenturat në kurriz të sigurisë kombëtare”.
Xhaçka foli për historinë e vitit 2012, kur baza ushtarake tha ajo, u degradua qëllimisht për ta shndërruar në një burim përfitimi për persona private. Forcës Detare iu kërkua zyrtarisht heqja nga Plani i Përhapjes së Bazës Detare të Kepit të Palit, por Meçollari dhe 15 drejtuesit e Forcës Detare nuk iu bindën urdhrave politike.
