Nga sot Ben Blushi do të jetë Drejtori i Përgjithshëm i Top Channel. Këtë lajm e ka dhënë vetë Presidentja e Top Medias, Vjollca Hoxha. Ajo përmes një komunikimi me drejtuesit e departamenteve të Top Channel, ka njoftuar këtë vendim .
“Kam kënaqësinë të njoftoj të gjithë shikuesit dhe punonjësit e Top Channel se duke filluar nga sot z. Ben Blushi do të jetë Drejtor i Përgjithshëm i Top Channel. Si një gazetar, shkrimtar dhe politikan që ka vendosur pavarësinë dhe të vërtetën mbi çdo interes, jam e bindur se z.Blushi do të ndihmojë Top Channel për të hapur një cikël të ri komunikimi dhe informimi me të gjithë dashamirësit tanë në krejt hapësirën shqipfolëse.
Dua t’i siguroj të gjithë se Top Channel i mbetet besnik parimeve tona si një media e lirë, e pavarur dhe profesionale, e cila ka qenë, është dhe do të jetë përherë në shërbim të së vërtetës dhe lirisë së informimit”, - thuhet në komunikimin e Presidentes Vjollca Hoxha.
Pak ditë më parë Blushi hoqi dorë nga drejtimi i partisë së tij LIBRA, si dhe njoftoi se do të largohet nga politika për ca kohë. Siç duket këtë kohë ai ka vendosur t’ia kushtojë gazetarisë si drejtor në Top Channel.
