Në mbledhjen e grupit parlamentar të PS-së, Edi Rama nuk e përmendi në asnjë moment protestën e të shtunës para kryeministrisë.
Por duke folur për kauzën që mblodhi në bulevard mijëra simpatizantë të opozitës, Rama tha se akuzat për kapjen e drejtësisë janë fantazi dhe dokrra. Si kundërprovë përmendi edhe njëherë mbështetjen që i kanë dhënë ambasadorët Donald Lu dhe Romana Vlahutin.
“Jemi në pozion të favorshëm pasi në momentin që flasim, Shqipëria konsiderohet se i ka kryer me përpikmëri detyrat e shtëpisë. Patjetër që nuk ka një moment ndalimi dhe procesi vazhdon ditë për ditë. Që do të thotë se procesi i përmbushjes së 5 prioriteteve, rezultati spektakolar në luftën kundër kanabisit dhe të gjitha hapat që janë hedhur me përpikmëri në raport me kalendarin e detyrave, përbëjnë njëkohësisht edhe një arsye të fortë për të ndarë me opinionin të vërtetën se fantazitë e ushqyera nga frika e një pjese të spektrit politik dhe propaganda për medemek kapjen e drejtësisë janë dokrra, se po të ishte ndryshe, askush e jo më BE dhe SHBA nuk do të lejonin shfaqjen më të vogël të përpjekjes për të kapur drejtësinë” tha kryeministri.
Reagimi i opozitës nisi me largimin e Adriatik Llallës nga posti i Prokurorit të Përgjithshëm, u përshkallëzua me votimin e Arta Markut si kryeprokurore e përkohshme dhe me atë që duket si shpërbërja e dosjes Tahiri, kur të arrestuarit për çështjen janë liruar dhe duket se hetimi po shkon drejt mbylljes.
