Lulzim Basha tha sot në Rrëshen se më 27 janar shqiptarët do të tregojnë se nuk pranojnë të jenë më spektatorë të teatrit të Edi Ramës.
Sipas Bashës, kryeministri fsheh varfërinë e qytetarëve dhe rrënimin e vendit me shfaqje luksoze.
Kreu i Partisë Demokratike u shpreh se kur heq Edi Ramën balerin, artist, sportist e babagjysh, mbetemi me një ekonomi të shkatërruar, bujqësi në faliment, rini të pashpresë, emigracion e çmime stratosferike.
“Kur i heq të gjitha, kur heq Edi Ramën balerin, Edi Ramën artist, Edi Ramën sportist, Edi Ramën babagjysh, kur i heq të gjitha këto me çfarë mbetemi? Mbetemi me një ekonomi të shkatërruar, me një bujqësi në faliment, me rini të pashpresë, me emigracion në rritje, me çmime në strastosferë të naftës, të dritave, të ujit. Me këto mbetemi. E gjithë pjesa tjetër është një shfaqje, është narkozë,” - tha Basha.
