Për herë të parë pas 3 vitesh, Hajrie Rondo foli publikisht për problemet shëndetësore që ka kaluar dhe që e kanë larguar nga skena shqiptare. Aktorja veterane, e ftuar në “Pasdite në Top Channel”, foli për sëmundjen, mbështetjen që ka marrë nga njerëzit e dashur dhe për të ardhmen që do ia kushtojë sërish teatrit.
Sëmundja - Prej disa kohësh i mungoj skenës pasi pata disa probleme shëndetësore. Në këto raste, 60% të meritës e ka lufta e pacientit me sëmundjen, kurajo dhe energjitë pozitive, ndërsa 40% mjekësia. Mbështetja e njerëzve të mi të dashur, spektatorëve dhe profesioni më kanë bërë të shërohem. Më kujtoheshin rolet e mia që gjithmonë kanë qenë role të forta. I thoja vetes që duhet të jetoja për të afërmit, të dashurit dhe spektatorët. Kam patur mbështetje nga Ministria e Shëndetësisë. Ministri Beqaj është treguar shumë i gatshëm, po ashtu si edhe ish-ministri.
Poezitë - Gjithmonë shkruaja poezi kur isha adoleshente, por më pas e lashë. Poezia nuk kërkon të jesh e lumtur dhe e qetë. Ajo është përjetim. Poezitë e mia janë sociale, duke u nisur nga përjetime jo të këndshme. Atëherë nisa të shkruaj seriozisht. Nisa të shkruaja kudo. I kam për veten time për momentin, ia recitoj miqve. E kam hobi poezinë, asgjë tjetër.
E ardhmja - Filmi i fundit ka qenë “Agon”, të cilin e kemi xhiruar në Selanik. Nga ajo kohë kanë kaluar gati tre vite. Më kanë ofruar role në teatër, por ndihesha ende e pafuqishme. Vetëm shpirti ma di dëshirën sa të madhe e kam për rikthim. Teatri ka një ritëm të lodhshëm pune, unë dua të rehabilitohem njëherë e pastaj të vendos, por besoj se nga pranvera do të kthehem.
Mesazhi - Jeta është e bukur dhe e shtrenjtë dhe e kupton vetëm kur kalon probleme. Duhet ta jetoni jetën me gjithë të mirat e saj sepse këtë e kemi në dorë vetë. Jetoni bukur dhe gëzueshëm!
