Ardit Gjebrea do të eksperimentojë një tjetër formë prezantimi të Këngës Magjike. Në festivalet e fundit ai ka ngjitur në skenë edhe prezantuese të huaja, apo edhe vajza të përzgjedhura rastësisht apo humoristë si Ermal Mamaqi e Ervin Bejleri. Këtë vit do të jenë 5 të rinj përkrah tij në skenë, për të prezantuar këngët konkurruese. Nuk janë të panjohur. Albi, Marsela, Mateo, Nevina e Rudi (nga e majta në të djathtë në foto), janë prezantues të MAD TV, kanalit të ri muzikor në Shqipëri. Në një intervistë për Anabel, skenaristja e Këngës Magjike, Danila Buzi, ka shpjeguar se kjo është një mënyrë për t’iu shmangur prezantimit klasik.
“Vjet i mëshuam shuëm humorit në skenar dhe këtë vit do të vazhdojmë ta bëjmë, por ndryshe nga Ermal Mamaqi dhe Ervin Bejleri, 5 djemtë dhe vajzat e MAD-it nuk janë aktorë që do t’i bazohen me përpikmëri një teksti. Ata do të sjellin lirshmëritë dhe energjinë e tyre rinore, që ka bërë aq të dashur ekranin e MAD TV.
Skenografia këtë vit i është besuar mjeshtrit italian, Gaetano Castelli, një bashkëpunëtor i ngushtë i TV Klan. Festivali do të mbahet në Pallatin e Kongreseve në datat 11, 12 dhe 13 Dhjetor.
