Për të dytën verë rradhaz, Tuna triumfon mbi artistët e tjerë duke grumbulluar numrin më të madh të klikimeve në Youtube gjatë sezonit të verës. Kënga e saj "MMV", një bashkëpunim me Ghetto Gheasy, ka arritur në 4,126,955 klikime që nga publikimi në 16 Korrik të 2014-ës.
Një vit më parë, në verë të 2013-ës, kënga e saj "Fenix" theu të gjitha rekorded e klikimeve dhe aktualisht është një nga videot shqiptare më të klikuara të të gjitha kohërave. (20,606,747 klikime) Por, surpriza e listës, është vendi i dytë. Këngëtarja e sapo-dalë në tregun muzikor, Enca Haxhia është vetëm 100,000 më pak klikime se Tuna, falë popullaritetit të jashtëzakonshëm që ajo po gëzon në tregun e vendeve muslimane të Azisë.
Duke parë këtë listë, kuptohet qartë se preferencat e shumicës së shqiptarëve ndahen në dy kampe: Kampi i Hip-hop, me emra si Ghetto Gheasy, Blunt, Ledri Vula, Noizy, Stresi apo Tingulli Trent. Në kampin tjetër janë shqiptarët që preferojnë pak ngjyra tallavaje në këngë. Meda, Adrian Gaxha & Floriani, Ermal Fejzullahu, Silva Gunbardhi & Dafi apo Sinan Hoxha e përfaqësojnë më së miri këtë gjini.
Në listë nuk mungojnë as emrat e njohur si Elvana Gjata me "1,2,3 Puthe", Flori Mumajesi me "Ta boja me drita" apo Alban Skënderaj me "24 ore ft. Young Zerka". Ky hit i Skënderaj (1,713,761 klikime) arriti gati të njëjtin sukses, sa "Nëse ti më do" (1,622,119) që këngëtari publikoi verën e kaluar.
Në këtë renditje u përfshinë mikeshat e ngushta dhe dy këngëtare të reja që po ecin shumë mirë në tregun e pop-it vitet e fundit, Ronela Hajati dhe fituesja e Top Fest 10, Samanta Karavello.
Fituesja e Këngës Magjike 2013, Besa Kokëdhima, edhe pse e publikoi videon e saj "Zejemër" në 30 Korrik, nuk kapi dot 1 milione klikime (Aktualisht ajo ka 711,374). Po ashtu, jashtë mbetën edhe bukuroshja Xhensila Myrtezai dhe Endri Prifti me klipin e tyre shumë veror "Vespa" (751,876 shikime)
Numri i klikimeve për çdo video është regjistruar nga Anabel në datën 7 shtator të 2014-ës. Shikimet për klip janë një matës i popullaritetit të këngës, por jo domosdoshmërisht vlerësues i cilësisë së këngës.
http://youtu.be/5vk1lvaQwcU
