Kryetari i Bashkisë së Tiranës, Erion Veliaj, ka firmosur disa ndryshime në institucion, pasi prej afro një muajsh e drejton qytetin më të madh të vendit, nga qelia e paraburgimit të Durrësit.
A2 raporton se kryebashkiaku i burgosur ka shkarkuar nga detyra disa administrator të njësive në kryeqytet.
Deri tani janë konfirmuar zyrtarisht nga Bashkia që këto ndryshime kanë prekur disa njësi.
Drejtuesit e njësisë 5 (Piro Jani) dhe 2 (Florian Pullazi) janë larguar nga detyra. Ndërkohë, administratorja e njësisë numër 1, Trendelina Jaku, është emëruar drejtore e Agjencisë së Mbrojtjes së Konsumatorit. Ndërsa administratori i Kasharit, Xhevahir Koçi, është emëruar drejtor i Agjencisë së Parqeve dhe Rekreacioneve.
Gjithashtu Veliaj ka emëruar këshilltare të tij Julinda Dhamen. Kjo e fundit njihet si një nga bashkëpunëtorët e tij më të afërta, përgjatë dy mandateve në Bashki. Deri tani Këshilli Bashkiak i Tiranës nuk ka bërë një kërkesë për delegimin e kompetencave të Veliajt te një prej nënkryetarëve, çka sjell që drejtimi i punëve të kryeqytetit, të vijojë të bëhet në korrespodeëncë nga paraburgimi.
Veliaj është rrëzuar në të gjitha shkallët e drejtësisë, për të fituar një masë më të butë sigurie, deri në dhënien e dënimit përfundimtar ndaj tij nga Gjykata e Posaçme.
