Donald Trump dëshiron presidentin e FIFA-s, Gianni Infantino, si Sekretarin e ardhshëm të Përgjithshëm të Organizatës së Kombeve të Bashkuara. Kështu raporton New York Post, duke cituar disa burime, sipas të cilave Trump beson se Infantino “respektohet nga të gjithë në botë dhe ka një aftësi të veçantë për të bashkuar njerëzit”.
Sekretari i ri i Përgjithshëm i OKB-së do të zgjidhet gjatë këtij viti për të zëvendësuar Antonio Guterres, mandati i të cilit përfundon në fund të muajit dhjetor. Për të siguruar këtë post, Infantino duhet të marrë mbështetjen e 15 anëtarëve të Këshillit të Sigurimit, përpara se kandidatura e tij të miratohet nga Asambleja e Përgjithshme e OKB-së.
Nuk është ende e qartë nëse Infantino është i interesuar për këtë detyrë dhe as nëse Trump ka biseduar me të për këtë mundësi. Ideja e miliarderit amerikan vjen në një moment kur, sipas një personi të njohur me procesin që foli për New York Post, lista e kandidatëve konsiderohet “e dobët”.
Mes kandidatëve përmenden ish-presidentja e Kilit, Michelle Bachelet, e cila mund të hasë kundërshtimin e Shteteve të Bashkuara, si edhe argjentinasi Rafael Grossi, drejtor i Agjencisë Ndërkombëtare të Energjisë Atomike, i cili mund të përballet me skepticizmin e Britanisë së Madhe për shkak të çështjes së Ishujve Falkland.
Një lëvizje shahu në fakt, sepse me italianin Infantino në krye të OKB-së, marrëdhëniet e Trump me organizatën mund të përmirësoheshin. Presidenti amerikan nuk i ka kursyer kurrë kritikat ndaj Kombeve të Bashkuara për mungesën e efikasitetit në ndërmjetësimin e konflikteve më të mëdha ndërkombëtare.
