Tobey Maguire dhe Jennifer Meyer i kanë dhënë fund zyrtarisht martesës së tyre, gati 10 vite pasi njoftuan ndarjen.
Sipas dokumenteve gjyqësore të siguruara nga “Page Six”, statusi martesor i ish-çiftit është përfunduar më 21 shtator, duke bërë që të dy të rikthehen zyrtarisht në statusin e personave beqarë.
Megjithatë, divorci i tyre nuk është mbyllur ende në të gjitha aspektet. Maguire dhe Meyer kanë ndarë statusin martesor nga çështjet e tjera të divorcit, që do të thotë se ende duhet të zgjidhin disa çështje të mbetura mes tyre.
Dokumentet, të depozituara zyrtarisht në Gjykatën e Lartë të Los Angelesit, nuk specifikojnë se cilat janë çështjet e pazgjidhura. Ato bëjnë të ditur vetëm se gjykata do të vazhdojë të ketë juridiksion për çështjet e tjera që lidhen me divorcin.
Aktori i njohur për rolin e Spider-Man dhe stilistja e bizhuterive u ndanë në vitin 2016, pas nëntë vitesh martesë. Meyer paraqiti kërkesën për divorc në tetor të vitit 2020.
Pavarësisht ndarjes, dyshja ka ruajtur një marrëdhënie të mirë si prindër. Ata kanë dy fëmijë së bashku, vajzën Ruby, 19 vjeç, dhe djalin Otis, 17 vjeç.
Në momentin e ndarjes, Maguire dhe Meyer deklaruan se prioriteti i tyre mbetej rritja e fëmijëve së bashku, me “dashuri, respekt dhe miqësi”.
Ndërkohë, Jennifer Meyer ka vijuar jetën e saj sentimentale. Ajo është e fejuar me producentin muzikor Geoffrey Ogunlesi, me të cilin u fejua në gusht të vitit 2024. Çifti është bërë gjithashtu prindër i një vajze në fillim të këtij viti.
